ਆਖ਼ਿਰ ਸਰਕਾਰ ਅਜਿਹੀ ਕਿਉਂ ਹੈ?

Wednesday: 30th September 2020 at 03:19 PM

 ਤੁਹਾਡੇ ਨਾਲੋਂ ਤਾਂ ਜਾਨਵਰ ਚੰਗੇ ਨੇ! ਜਾਨਵਰ! 

ਸੋਸ਼ਲ ਮੀਡੀਆ: 30 ਸਤੰਬਰ 2020: (ਨੀਤੂ ਰਾਮਪੁਰ//ਲੋਕ ਮੀਡੀਆ ਮੰਚ)::

ਬਹੁਤ ਹੀ ਬੇਬਾਕੀ ਅਤੇ ਹਿੰਮਤ ਨਾਲ ਲਿਖਣ ਵਾਲੀ ਨੀਤੂ ਰਾਮਪੁਰ ਨੇ ਹਾਥਰਸ ਵਿੱਚ ਦਰਿੰਦਗੀ ਦਾ ਸ਼ਿਕਾਰ ਹੋਈ ਕੁੜੀ ਦੀ ਮੌਤ ਮਗਰੋਂ ਵੀ ਆਪਣਾ ਗੁੱਸਾ ਦਿਲ ਹਲੂਣਵੇਂ ਅੰਦਾਜ਼ ਨਾਲ ਪੇਸ਼ ਕੀਤਾ ਹੈ। ਉਸ ਨੇ ਆਪਣੀ  ਫੇਸਬੁੱਕ ਪ੍ਰੋਫ਼ਾਈਲ ਤੇ ਲਿਖਿਆ ਹੈ-

ਆਖ਼ਿਰ ਕੀ ਵਿਗਾੜਦੀਆਂ ਨੇ

ਤੁਹਾਡਾ ਕੁੜੀਆਂ

ਆਖ਼ਿਰ ਕੀ??

ਕੀ ਕਸੂਰ ਸੀ ਇਹਦਾ ਜੋ ਤੁਸੀ ਇਸ ਮਾਸੂਮ ਨੂੰ ਦਬੋਚ ਲਿਆ,ਬਣਾ ਲਿਆ ਆਪਣੀ ਗੰਦੀ ਨਜ਼ਰ ਦਾ ਸ਼ਿਕਾਰ,ਗੰਦੀ ਨਾਲੀ ਦੇ ਗੰਦੇ ਕੀੜਿਓ... ਤੁਹਾਡੀ ਹੱਵਸ਼ ਮੁੱਕਦੀ ਕਿਉਂ ਨੀ?

ਤੁਹਾਡੇ ਨਾਲੋਂ ਤਾਂ ਜਾਨਵਰ ਚੰਗੇ ਨੇ। ਜਾਨਵਰ।

ਰੂਹ ਚੀਕ ਉੱਠੀ ਮੇਰੀ। ਆਖ਼ਿਰ ਸਰਕਾਰ ਅਜਿਹੀ ਕਿਉਂ ਹੈ? ਹਾਂ ਹੁਣ ਕੇਸ ਚੱਲੇਗਾ ਬਣਦੀ ਕਾਰਵਾਈ ਹੋਏਗੀ ਤੇ ਬਸ.................???? ਇਹੋ ਹੋਏਗਾ ਨਾ? ਉਹਨਾਂ ਨੂੰ ਨਹੀਂ ਮਹਿਸੂਸ ਕਰਵਾਇਆ ਜਾਣਾ ਜੀਭ ਕੱਟਣ ਦਾ ਦਰਦ, ਨਹੀਂ ਉਹਨਾਂ ਦੀਆਂ ਹੱਡੀਆਂ ਤੋੜੀਆਂ ਜਾਣੀਆਂ। ਨਹੀਂ ਉਹਨਾਂ ਨੂੰ ਤੜਫਾਇਆ ਜਾਣਾ। ਨਹੀਂ ਲਿਆ ਜਾਣਾ ਬਦਲਾ। ਨਹੀਂ ਮਿਲਣਾ ਇਨਸਾਫ਼। ਕਿੰਨਾ ਤੜਫੜੀ ਹੋਉਗੀ, ਕਿੰਨਾ ਗਿੜਗੀੜਾਈ ਹੋਉਗੀ ਉਹ ਮਾਸੂਮ ਪਰ ਕਿਸੇ ਨੇ ਨੀ ਸੁਣੀ। ਸਰਕਾਰ ਗੰਦੀਆਂ,ਗੰਦੀ।

ਜਿਵੇਂ ਕੋਈ ਮੇਰੀ ਜਾਨ ਕੱਢਕੇ ਹਥੇਲੀ ਤੇ ਰੱਖ ਗਿਆ ਹੋਵੇ।

ਉਫ਼...............................  

AISF ਦੀ ਵਿਸ਼ੇਸ਼ ਮੀਟਿੰਗ ਨੇ ਨਵੀਂ ਚੋਣ ਸਮੇਂ ਲਿਆ ਹਾਲਾਤ ਦਾ ਜਾਇਜ਼ਾ

 ਕਿਸਾਨੀ ਬਲਦੀ ਦੇ ਬੂਥੇ ਅਤੇ ਬੀਜੇਪੀ ਵੱਲੋਂ ਕੇਕ ਕੱਟਣ ਦਾ ਗੰਭੀਰ ਨੋਟਿਸ    

ਲੁਧਿਆਣਾ:20 ਸਤੰਬਰ 2020:: (ਲੋਕ ਮੀਡੀਆ ਮੰਚ ਬਿਊਰੋ)::

ਆਲ ਇੰਡੀਆ ਸਟੂਡੈਂਟਸ ਫੈਡਰੇਸ਼ਨ ਮੌਜੂਦਾ ਸਮੇਂ ਦੇ ਬੇਹੱਦ ਨਾਜ਼ੁਕ ਦੌਰ ਵਿੱਚ ਹੈ। ਪੂਰਾ ਦੇਸ਼ ਕੇਂਦਰ ਸਰਕਾਰ ਦੇ ਖਿਲਾਫ ਉਬਾਲੇ ਖਾ ਰਿਹਾ ਹੈ। ਨਵੀਂ ਸਿੱਖਿਆ ਨੀਤੀ ਮਗਰੋਂ ਖੇਤੀ ਆਰਡੀਨੈਂਸਾਂ ਦਾ ਮੁੱਦਾ ਗਰਮਾਇਆ ਹੋਇਆ ਹੈ। ਕਿਸਾਨ ਦੇ ਖੇਤ, ਉਸਦੀ ਫਸਲ ਅਤੇ ਉਸਦੀ ਕਿਰਤ ਸ਼ਕਤੀ ਸਭ ਕੁਛ ਖਤਰੇ ਵਿੱਚ ਨਜ਼ਰ ਆ ਰਿਹਾ ਹੈ। 

ਹੁਣ ਜਦੋਂ ਕਿ ਕਾਲਜਾਂ ਦੇ ਇਮਤਿਹਾਨ ਸ਼ੁਰੂ ਹੋ ਚੁੱਕੇ ਹਨ ਅਤੇ ਵਿਦਿਆਰਥੀਆਂ ਵੱਲੋਂ ਪੇਪਰ ਦਿੱਤੇ ਜਾ ਰਹੇ ਹਨ। ਪੇਪਰਾਂ ਦੀ ਫੀਸ ਵਾਲੀ ਪੂਰੀ ਪੇਮੈਂਟ ਵੀ ਐਡਵਾਂਸ ਦਿੱਤੀ ਹੋਈ ਹੋਣ ਦੇ ਬਾਵਜੂਦ ਇਹਨਾਂ ਇਮਤਿਹਾਨਾਂ ਵਿੱਚ ਆਏ ਸੁਆਲਾਂ ਦੇ ਜੁਆਬ ਲਿਖਣ ਲਈ ਵਿਦਿਆਰਥੀਆਂ ਨੂੰ ਉੱਤਰ ਸ਼ੀਟਾਂ ਖੁਦ ਖਰੀਦ ਕੇ ਲਿਖਣੀਆਂ ਪੈ ਰਹੀਆਂ ਹਨ। ਸੱਚਮੁੱਚ ਮੌਜੂਦਾ ਦੌਰ  ਵਿਦਿਆਰਥੀ ਵਰਗ ਲਈ ਸਿਰ ਜੋੜ ਕੇ ਸੋਚਣ ਦਾ ਸਮਾਂ ਹੈ। 

ਜ਼ਿਕਰਯੋਗ ਹੈ ਕਿ ਇਸ ਨਵੇਂ ਸਿਸਟਮ ਨਾਲ ਅਧਿਆਪਕ ਵਰਗ ਤੇ ਵੀ ਕੰਮ ਦਾ ਬੋਝ ਵੱਧ ਗਿਆ ਹੈ। ਇਮਤਿਹਾਨਾਂ ਦੇ ਪਹਿਲੇ ਦਿਨ ਹੀ ਅਧਿਆਪਕ ਵਰਗ ਨੂੰ ਸਾਰੇ ਪ੍ਰਬੰਧ ਪੂਰੇ ਕਰਦਿਆਂ ਕਾਲਜ ਵਿੱਚ ਹੀ ਰਾਤ ਦੇ ਅੱਠ ਵੱਜ ਗਏ ਸਨ। ਇਸ ਸਭ ਕੁਝ ਨੂੰ ਅਧਿਆਪਕ ਵਰਗ ਨੇ ਵੀ ਖਾਮੋਸ਼ੀ ਨਾਲ ਸਹਿ ਲਿਆ ਤਾਂਕਿ ਇਮਤਿਹਾਨਾਂ ਵਿੱਚ ਕੋਈ ਵਿਘਨ ਨਾ ਪਵੇ। ਵਿਦਿਅਕ ਸੰਗਠਨਾਂ ਨੂੰ ਇਸ ਸਭ ਕੁਝ ਦਾ ਗੰਭੀਰ ਨੋਟਿਸ ਲੈਂਦਿਆਂ ਖੁਦ ਹੀ ਅੱਗੇ ਆਉਣਾ ਪੈਣਾ ਹੈ ਅਤੇ ਦੱਸਣਾ ਪੈਣਾ ਹੈ ਕਿ ਅਧਿਆਪਕ ਵੀ ਇਨਸਾਨ ਹੁੰਦੇ ਹਨ ਕੋਈ ਮਸ਼ੀਨ ਨਹੀਂ ਹੁੰਦੇ। ਅਫਸੋਸ ਕਿ ਇਸ ਬਾਰੇ ਅਜੇ ਤੱਕ ਕੋਈ ਠੋਸ ਆਵਾਜ਼ ਨਹੀਂ ਉੱਠੀ। ਹਾਲਾਤ ਦੇ ਬਦਤਰ ਹੋਣ ਵਾਲੀ ਇਹੀ ਹਾਲਤ ਦੂਜੇ ਮਾਮਲਿਆਂ ਵਿੱਚ ਵੀ ਜਾਰੀ ਹੈ। 

ਹੁਣ ਜਦੋਂ  ਖੇਤੀ ਆਰਡੀਨੈਂਸਾਂ ਦੇ ਮੁੱਦੇ ਨੂੰ ਲੈ ਕੇ ਪੂਰੇ ਦੇਸ਼ ਦੇ ਨਾਲ ਨਾਲ ਪੰਜਾਬ ਵਿੱਚ ਵੀ ਅੱਗ ਲੱਗੀ ਹੋਈ ਹੈ।  ਕਿਸਾਨ ਖੁਦਕੁਸ਼ੀਆਂ ਕਰ ਰਹੇ ਹਨ ਅਤੇ ਹੁਣ ਤੱਕ ਦਾ ਇਤਿਹਾਸਿਕ ਕਿਸਾਨੀ ਅੰਦੋਲਨ ਸ਼ੁਰੂ ਹੋ ਚੁੱਕਿਆ ਹੈ ਉਦੋਂ  ਬੀਜੇਪੀ ਦਾ ਕੇਡਰ ਇਸ ਅਗਨੀਂ ਨੂੰ ਸ਼ਾਂਤ ਕਰਨ ਦੀ ਕੋਈ ਨਿੱਕੀ ਮੋਟੀ ਰਸਮੀ ਕੋਸ਼ਿਸ਼ ਵੀ ਨਹੀਂ ਕਰ ਰਿਹਾ। ਆਪਣੀ ਇਸ ਕਲੰਕਿਤ ਜਿੱਤ ਉੱਤੇ ਬਾਘੀਆਂ ਪਾਉਂਦਿਆਂ ਬੀਜੇਪੀ ਲੀਡਰ ਅਤੇ ਵਰਕਰ ਖੁਸ਼ੀਆਂ ਦੇ ਨਾਚ ਨੱਚ ਰਹੇ ਹਨ। ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦੇ ਜਨਮਦਿਨ ਨੂੰ ਬਹਾਨਾ ਬਣਾ ਕੇ ਥਾਂ ਥਾਂ ਕੇਕ ਕੱਟੇ ਜਾ ਰਹੇ ਹਨ। ਅਜਿਹਾ ਕਰਕੇ ਇੱਕ ਤਰਾਂ ਨਾਲ ਕਿਸਾਨੀ ਅਤੇ ਪੰਜਾਬ ਦੀ ਬਰਬਾਦੀ ਦਾ ਐਲਾਨੀਆ ਜਸ਼ਨ ਮਨਾਇਆ ਜਾ ਰਿਹਾ ਹੈ। ਇਸ ਸਥਿਤੀ ਉੱਤੇ ਬਾਜ਼ ਨਜ਼ਰ ਰੱਖਦਿਆਂ ਆਖਿਰ ਹੁਣ ਵਿਦਿਆਰਥੀ ਜਾਗੇ ਹਨ ਅਤੇ ਸਰਗਰਮ ਵੀ ਹੋਏ ਹਨ। ਕਿਸਾਨੀ ਮਗਰੋਂ ਵਿਦਿਆਰਥੀਆਂ ਦਾ ਵੱਡਾ ਉਭਾਰ ਵੀ  ਛੇਤੀ ਹੀ ਸਾਹਮਣੇ ਆਉਣ ਵਾਲਾ ਹੈ। ਇਨਕਲਾਬ ਦਾ ਇੱਕ ਨਵਾਂ ਸੁਨਹਿਰੀ ਅਧਿਆਏ ਲਿਖਿਆ ਜਾ ਰਿਹਾ ਹੈ। 

ਖੱਬੇ ਪੱਖੀ ਵਿਦਿਆਰਥੀ ਜੱਥੇਬੰਦੀ ਆਲ ਇੰਡੀਆ ਸਟੂਡੈਂਟ ਫੈਡਰੇਸ਼ਨ ਮੌਜੂਦਾ ਹਾਲਾਤ ਨੂੰ ਲੈ ਕੇ ਡੂੰਘੀ ਚਿੰਤਾ ਵਿੱਚ ਹੈ। ਇਸ ਨਾਜ਼ੁਕ ਹਾਲਤ ਵਿੱਚ ਹੀ ਏ ਆਈ ਐਸ ਐਫ ਦੀ ਲੁਧਿਆਣਾ ਇਕਾਈ ਦੀ ਇੱਕ ਵਿਸ਼ੇਸ਼ ਮੀਟਿੰਗ ਸ਼ਹੀਦ ਕਰਨੈਲ ਸਿੰਘ ਈਸੜੂ ਭਵਨ, ਅਬਦੁੱਲਾਪੁਰ ਬਸਤੀ ਵਿਚ ਆਯੋਜਿਤ ਕੀਤੀ ਗਈ। 

ਇਸ ਮੀਟਿੰਗ ਵਿੱਚ ਸ਼ਹੀਦ ਭਗਤ ਸਿੰਘ ਦੇ ਜਨਮ ਦਿਵਸ ਉੱਤੇ ਹੋਣ ਵਾਲੇ ਸੈਮੀਨਾਰ ਉੱਤੇ ਵਿਚਾਰ ਚਰਚਾ ਕੀਤੀ ਗਈ।  ਨਵੀਂ ਸਿੱਖਿਆ ਨੀਤੀ ਅਤੇ ਬੇਰੋਜ਼ਗਾਰੀ ਵੀ ਮੀਟਿੰਗ ਦੇ ਮੁਖ ਵਿਸ਼ੇ ਰਹੇ।  ਖੱਬੀ ਲਹਿਰ ਦੇ ਸਮਰਪਿਤ ਅਤੇ ਸਰਗਰਮ ਆਗੂ ਡਾ. ਅਰੁਣ ਮਿੱਤਰਾ ਨੇ ਬੇਰੋਜ਼ਗਾਰੀ ਨੂੰ ਇਸ ਸਮੇ ਦੀ ਮੁੱਖ ਸਮੱਸਿਆ ਦੱਸਦੇ ਹੋਏ ਕਿਹਾ ਕਿ ਸਮੇ ਦੀਆਂ ਸਰਕਾਰਾਂ ਨੂੰ ਬੇਰੋਜ਼ਗਾਰੀ ਤੇ ਲਗਾਮ ਲਗਾਉਣ ਦੇ ਪ੍ਰਬੰਧ ਕਰਨੇ ਚਾਹੀਦੇ ਹਨ।  

ਬਜ਼ੁਰਗ ਕਾਮਰੇਡ ਆਗੂ ਚਰਨ ਸਿੰਘ ਸਰਾਭਾ ਨੇ ਨਵੀਂ ਸਿਖਿਆ ਨੀਤੀ ਤੇ ਚਾਨਣਾ ਪਾਉਂਦੇ ਹੋਏ ਕਿਹਾ ਕਿ ਸਰਕਾਰ ਨੇ ਵਿਦਿਆਰਥੀਆਂ ਨਾਲ ਕੋਝਾ ਮਜ਼ਾਕ ਕੀਤਾ ਹੈ। ਸਰਕਾਰ ਨੂੰ ਸਮਝਣਾ ਚਾਹੀਦਾ ਹੈ ਕਿ ਨੌਜਵਾਨ ਅਤੇ ਵਿਦਿਆਰਥੀ ਇਸ ਦੇਸ਼ ਦਾ ਭਵਿੱਖ ਹਨ ਅਤੇ ਸਰਕਾਰ ਨੂੰ ਉਹਨਾਂ ਬਾਰੇ ਤੁਰੰਤ ਠੋਸ ਕਦਮ ਚੁੱਕਣ ਵਾਲੀ ਸੋਚ ਵਿਚਾਰ ਕਰਨੀ ਚਾਹੀਦੀ ਹੈ। 

ਨੌਜਵਾਨ ਆਗੂ ਸੁਖਵਿੰਦਰ ਮਹੇਸ਼ਵਰੀ ਨੇ ਬਨੇਗਾ (BNEGA) ਐਕਟ ਤੇ ਚਾਨਣਾ ਪਾਉਂਦੇ ਹੋਏ ਇਸਦੀ ਮਹੱਤਤਾ ਨੂੰ ਉਜਾਗਰ ਕੀਤਾ।  ਇਸ ਦੇ ਨਾਲ ਹੀ AISF ਲੁਧਿਆਣਾ ਦੀ ਨਵੀ ਕਮੇਟੀ ਵੀ ਬਣਾਈ ਗਈ। ਸੌਰਵ  ਨੂੰ ਪ੍ਰਧਾਨ, ਕਾਰਤਿਕਾ ਸਿੰਘ ਤੇ ਮਨਪ੍ਰੀਤ ਕੌਰ ਨੂੰ ਉਪ-ਪ੍ਰਧਾਨ, ਦੀਪਕ ਕੁਮਾਰ ਨੂੰ ਸਕੱਤਰ, ਲਲਿਤ ਕੁਮਾਰ ਤੇ ਰਾਜੀਵ ਕੁਮਾਰ ਨੂੰ ਸਹਿ-ਸਕੱਤਰ, ਪ੍ਰਦੀਪ ਕੁਮਾਰ ਨੂੰ ਖ਼ਜ਼ਾਨਚੀ ਅਤੇ ਪ੍ਰਦੀਪ ਖ਼ੈਰਾ ਨੂੰ ਸਹਿ-ਖ਼ਜ਼ਾਨਚੀ ਨਿਯੁਕਤ ਕਿੱਤਾ ਗਿਆ। ਇਸ ਮੌਕੇ ਤੇ ਰਾਹੁਲ ਧੀਮਾਨ, ਬਿੱਟੂ ਕੁਮਾਰ, ਰਿਸ਼ੂ ਸਿੰਘ, ਪ੍ਰਤਾਪ ਕੁਮਾਰ ਅਤੇ ਮਨਦੀਪ ਸਿੰਘ ਮੌਜੂਦ ਸਨ। 

 AISF ਦੀ ਚੋਣ ਮਗਰੋਂ ਬਣੀ ਨਵੀਂ  ਕਮੇਟੀ ਨੇ ਆਪਣੀ ਇਸ ਵਿਸ਼ੇਸ਼ ਮੀਟਿੰਗ ਵਿੱਚ ਹਾਲਾਤ ਦਾ ਗੰਭੀਰਤਾ ਨਾਲ ਜਾਇਜ਼ਾ ਲਿਆ। ਨਿਸਚੇ ਹੀ ਨਵੀਂ ਕਮੇਟੀ ਸਿਰ ਆਈਆਂ ਨਵੀਆਂ ਜ਼ਿੰਮੇਵਾਰੀਆਂ ਬਹੁਤ ਭਾਰੀਆਂ ਹਨ ਪਰ AISF  ਇਹਨਾਂ ਸਾਰੀਆਂ ਚੁਣੌਤੀਆਂ ਨੂੰ ਕਬੂਲ ਕਰਕੇ ਇੱਕ ਨਵਾਂ ਇਤਿਹਾਸ ਰਚੇਗੀ ਕਿਓਂਕਿ ਪਹਿਲਾਂ ਵੀ ਇਸ ਵਿਦਿਆਰਥੀ ਜੱਥੇਬੰਦੀ ਦਾ ਇਤਿਹਾਸ ਅਜਿਹਾ ਹੀ ਸ਼ਾਨਾਂਮੱਤਾ ਰਿਹਾ ਹੈ। 

ਕੇਂਦਰ ਸਰਕਾਰ ਦੇ ਕਿਸਾਨ ਵਿਰੋਧੀ ਕਾਨੂੰਨਾਂ ਦਾ ਤਿੱਖਾ ਵਿਰੋਧ ਜਾਰੀ

20th September 2020 at 3:36 PM

 ਡੇਹਲੋਂ  ਅਤੇ ਜੋਧਾਂ ਵਿੱਚ ਵੀ ਪ੍ਰਧਾਨਮੰਤਰੀ ਮੋਦੀ ਦੇ ਪੁਤਲੇ ਫੂਕੇ ਗਏ 

 ਵਿਰੋਧ ਦੀ  ਲਹਿਰ  ਹੋ ਰਹੀ ਹੈ ਹਰ ਪਲ ਤੇਜ਼  

ਡੇਹਲੋ: (ਲੁਧਿਆਣਾ): 20 ਸਤੰਬਰ 2020: (ਐਮ ਐਸ ਭਾਟੀਆ//ਲੋਕ ਮੀਡੀਆ ਮੰਚ ਟੀਮ)::

ਅੱਜ ਜਮਹੂਰੀ ਕਿਸਾਨ ਸਭਾ ਪੰਜਾਬ ਵੱਲੋਂ ਕਿਸਾਨ ਜਥੇਬੰਦੀ ਦੇ ਸਾਂਝੇ ਮੋਰਚੇ ਦੇ ਸੱਦੇ ਤੇ ਪਿੰਡ ਸੀਲੋ ਵਿਖੇ ਸੁਰਜੀਤ ਸਿੰਘ ਸੀਲੋ ਦੀ ਪ੍ਰਧਾਨਗੀ ਹੇਠ ਰੋਸ ਪ੍ਰਦਰਸ਼ਨ ਕਰਕੇ ਪ੍ਰਧਾਨ ਮੰਤਰੀ ਮੋਦੀ ਦਾ ਪੁਤਲਾ ਫੂਕਿਆ। ਇਸ ਮੌਕੇ ਤੇ ਜਮਹੂਰੀ ਕਿਸਾਨ ਸਭਾ ਪੰਜਾਬ ਦੇ ਸੂਬਾਈ ਆਗੂ ਜਗਤਾਰ ਸਿੰਘ ਚਕੌਹੀ ਨੇ ਸੰਬੋਧਨ ਕਰਦਿਆਂ ਆਖਿਆ ਕਿ ਕੇਂਦਰ ਸਰਕਾਰ ਵੱਲੋਂ ਪਾਸ ਕੀਤੇ ਤਿੰਨੇ ਕਨੂੰਨ ਕਿਸਾਨ ਵਿਰੋਧੀ ਹਨ ਇਹਨਾ ਕਨੂੰਨਾਂ ਦੇ ਲਾਗੂ ਹੋਣ ਨਾਲ ਦੇਸ਼ ਵਿੱਚ ਕਿਸਾਨਾਂ ਦੀ ਹਾਲਤ ਹੋਰ ਨਿੱਘਰ ਜਾਵੇਗੀ ਤੇ ਦੇਸ਼ ਤਬਾਹੀ ਦੇ ਕੰਢੇ ਤੇ ਚਲਾ ਜਾਵੇਗਾ । ਉਹਨਾ ਕਿਹਾ ਕਿ ਦੇਸ਼ ਦੇ ਲੋਕ ਇਹ ਕਾਨੂੰਨ ਲਾਗੂ ਨਹੀਂ ਹੋਣ ਦੇਣਗੇ । ਉਹਨਾ 25 ਸਤੰਬਰ ਨੂੰ ਪੰਜਾਬ ਬੰਦ ਦੇ ਸੱਦੇ ਨੂੰ ਕਾਮਯਾਬ ਕਰਨ ਲਈ ਕਿਹਾ । ਇਸ ਮੌਕੇ ਤੇ ਹੋਰਨਾਂ ਤੋਂ ਇਲਾਵਾ ਪਿਆਰਾ ਸਿੰਘ ਸਾਬਕਾ ਸਰਪੰਚ ਭੁੱਟਾ, ਸਾਬਕਾ ਸਰਪੰਚ ਧਰਮਜੀਤ ਸਿੰਘ ਸੀਲੋ ਖ਼ੁਰਦ , ਮਨਜਿੰਦਰ ਸਿੰਘ ਸੀਲੋ , ਸਰਪੰਚ ਦਵਿੰਦਰ ਸਿੰਘ ਸੀਲੋ ਕਲਾ , ਅਮਨ ਬੂਲ , ਦੀਪ ਟਿੱਬਾ ਆਦਿ ਹਾਜ਼ਰ ਸਨ।  

ਜਮਹੂਰੀ ਕਿਸਾਨ ਸਭਾ ਪੰਜਾਬ ਵੱਲੋਂ ਜੋਧਾਂ ਵਿਖੇ ਸਾੜਿਆ ਮੋਦੀ ਦਾ ਪੁਤਲਾ 

 ਕਿਸਾਨ ਤੇ ਲੋਕ ਵਿਰੋਧੀ ਪਾਸ ਕੀਤੇ ਤਿੰਨੇ ਕਾਨੂੰਨ ਰੱਦ ਕੀਤੇ ਜਾਣ-ਗੁੱਜਰਵਾਲ

ਅੱਜ ਕਿਸਾਨ ਜਥੇਬੰਦੀਆਂ ਦੇ ਸਾਂਝੇ ਮੋਰਚੇ ਵੱਲੋਂ ਦਿੱਤੇ ਗਏ ਸੂਬਾ ਪੱਧਰੀ ਸੱਦੇ ਤਹਿਤ ਸ਼ਹੀਦ ਕਰਤਾਰ ਸਿੰਘ ਸਰਾਭਾ ਮਾਰਗ ਤੇ ਸਥਿਤ ਕਸਬਾ ਜੋਧਾਂ ਵਿਖੇ ਜਮਹੂਰੀ ਕਿਸਾਨ ਸਭਾ ਵੱਲੋਂ ਕੇਂਦਰ ਦੀ ਮੋਦੀ ਸਰਕਾਰ ਵੱਲੋਂ ਪਾਸ ਕੀਤੇ ਕਿਸਾਨ ਤੇ ਲੋਕ ਵਿਰੋਧੀ ਤਿੰਨੇ ਕਾਨੂੰਨ ਵਾਪਸ ਲੈਣ ਦੀ ਮੰਗ ਨੂੰ ਲੈਕੇ ਪ੍ਰਧਾਨ ਮੰਤਰੀ ਮੋਦੀ ਦਾ ਪੁਤਲਾ ਸਾੜਿਆ ਤੇ ਸਰਕਾਰ ਖਿਲਾਫ ਜੰਮ ਕੇ ਨਾਹਰੇਬਾਜ਼ੀ ਕੀਤੀ । ਇਸ ਰੋਸ ਪ੍ਰਦਰਸ਼ਨ ਦੀ ਅਗਵਾਈ ਲੁਧਿਆਣਾ ਤਹਿਸੀਲ ਦੇ ਪ੍ਰਧਾਨ ਬਲਦੇਵ ਸਿੰਘ ਧੂਰਕੋਟ , ਜ: ਸਕੱਤਰ ਅਮਰਜੀਤ ਸਿੰਘ ਸਹਿਜਾਦ , ਬੂਟਾ ਸਿੰਘ ਸਰਾਭਾ ਤੇ ਸਿਕੰਦਰ ਸਿੰਘ ਹਿਮਾਯੂਪੁੱਰ ਨੇ ਕੀਤੀ । ਇਸ ਮੌਕੇ ਤੇ ਸੰਬੋਧਨ ਕਰਦਿਆਂ ਜਮਹੂਰੀ ਕਿਸਾਨ ਸਭਾ ਦੇ ਆਗੂ ਤੇ ਸ਼ਹੀਦ ਭਗਤ ਸਿੰਘ ਨੌਜਵਾਨ ਸਭਾ ਪੰਜਾਬ ਦੇ ਜਿਲ੍ਹਾ ਸਕੱਤਰ ਹਰਨੇਕ ਸਿੰਘ ਗੁੱਜਰਵਾਲ ਨੇ ਕਿਹਾ ਕਿ ਮੋਦੀ ਸਰਕਾਰ ਵੱਲੋਂ ਪਾਸ ਕੀਤੇ ਕਾਨੂੰਨ ਲਾਗੂ ਹੋਣ ਨਾਲ ਦੇਸ਼ ਦੀ ਕਿਸਾਨੀ ਹੋਰ ਘਾਟੇ ਵਿੱਚ ਜਾਵੇਗੀ । ਇਹਨਾ ਕਾਨੂੰਨ ਦੇ ਕਰਕੇ ਦੇਸ਼ ਵਿੱਚ ਮਹਿੰਗਾਈ , ਬੇਰੁਜ਼ਗਾਰੀ , ਜ਼ਰੂਰੀ ਵਸਤਾਂ ਦੀ ਥੁੜ ਪੈਦਾ ਹੋਵੇਗੀ । ਉਹਨਾ ਮੰਗ ਕੀਤੀ ਕਿ ਇਹ ਕਨੂੰਨ ਵਾਪਸ ਲਏ ਜਾਣ । ਉਹਨਾ ਕਿਹਾ ਕਿ ਕਿਸਾਨ ਤੇ ਪੰਜਾਬ ਦੇ ਲੋਕ 25 ਸਤੰਬਰ ਨੂੰ ਪੰਜਾਬ ਬੰਦ ਕਰਨਗੇ ਅਤੇ ਮੋਦੀ ਸਰਕਾਰ ਨੂੰ ਇਹ ਕਨੂੰਨ ਵਾਪਸ ਲੈਣ ਤੇ ਮਜ਼ਬੂਰ ਕਰ ਦੇਣ ਗੇ । ਇਸ ਮੌਕੇ ਤੇ ਹੋਰਨਾਂ ਤੋਂ ਇਲਾਵਾ ਮਨਪ੍ਰੀਤ ਮੋਨੂੰ , ਦਵਿੰਦਰ ਸਿੰਘ ਰਾਣਾ ਲਤਾਲਾ , ਅਮਰੀਕ ਸਿੰਘ ਮੀਕਾ ਜੋਧਾਂ ,  ਮਨਪਿੰਦਰ ਸਿੰਘ ਮਨਸੂਰਾਂ , ਚਮਕੌਰ ਸਿੰਘ ਸੇਖੋ ਛਪਾਰ , ਲੱਖਾਂ ਖੰਡੂਰ , ਰੁਪਿੰਦਰ ਸਿੰਘ ਰਤਨਾਂ , ਹਰਜਿੰਦਰ ਸਿੰਘ , ਪ੍ਰੇਮ ਸਿੰਘ , ਮੇਜਰ ਸਿੰਘ , ਕਾਲਾ , ਨਿਰਮਲ ਸਿੰਘ ( ਸਾਰੇ ਜੋਧਾਂ ) , ਭੋਲਾ , ਰਾਜੂ ਖੰਡੂਰ , ਬਲਵੀਰ ਸਿੰਘ ਆਦਿ ਹਾਜ਼ਰ ਸਨ ।

ਕਾਮਰੇਡ ਚਮਕੌਰ ਦੇ ਪੋਤਰੇ ਤਨਵੀਰ ਦਾ ਜਨਮਦਿਨ 16 ਨੂੰ

15th September 2020 at 4:20 PM

 ਲੋਕਪੱਖੀ ਰਵਾਇਤਾਂ ਅਤੇ ਅੰਦਾਜ਼ ਨਾਲ ਮਨਾਇਆ ਜਾਏਗਾ ਜਨਮਦਿਨ  

ਲੁਧਿਆਣਾ: 15 ਸਤੰਬਰ 2020: (ਐਮ ਐਸ ਭਾਟੀਆ//ਲੋਕ ਮੀਡੀਆ ਮੰਚ)::

ਦੁਨੀਆ ਲੰਮੇ ਸਮੇਂ ਤੋਂ ਦੋ ਧੜਿਆਂ ਵਿੱਚ ਵੰਡੀ ਹੋਈ ਹੈ। ਹੁਣ ਇਹ ਲਕੀਰ ਹੋਰ ਗੂਹੜੀ ਹੁੰਦੀ ਜਾ ਰਹੀ ਹੈ। ਇਸ ਲਕੀਰ ਦੇ ਇੱਕ ਪਾਸੇ ਹਨ ਗਰੀਬ ਕਿਰਤੀ ਮਜ਼ਦੂਰ ਜਿਹਨਾਂ ਨੇ ਬਹੁਤ ਹੀ ਇਮਾਨਦਾਰੀ ਨਾਲ ਦੋ ਵਕ਼ਤ ਦੀ ਰੋਟੀ ਕਮਾ ਕੇ ਆਪ ਵੀ ਖਾਣੀ ਹੁੰਦੀ ਹੈ, ਪਰਿਵਾਰ ਨੂੰ ਵੀ ਖੁਆਣੀ ਹੁੰਦੀ ਹੈ ਅਤੇ ਆਏ ਗਏ ਦੀ ਸੇਵਾ ਵੀ ਕਰਨੀ ਹੁੰਦੀ ਹੈ। 

ਲਕੀਰ ਦੇ ਇਸ ਪਾਸੇ ਰਹਿਣ ਵਾਲੇ ਇਹਨਾਂ ਕਿਰਤੀਆਂ ਦਾ ਪਿਤਾ ਪੁਰਖੀ ਸੰਬੰਧ ਭਾਈ ਲਾਲੋਆਂ ਨਾਲ ਜਾ ਰਲਦਾ ਹੈ ਜਿਹਨਾਂ ਨੂੰ ਧੰਨ ਗੁਰੂ ਨਾਨਕ ਦੇਵ ਸਾਹਿਬ ਨੇ ਆਪਣੇ ਗਲ ਨਾਲ ਲਾਇਆ ਸੀ। ਇਸ ਲਕੀਰ ਦੇ ਦੂਜੇ ਪਾਸੇ ਹਨ ਇਸ ਧਰਤੀ ਅਤੇ ਇਸ ਧਰਤੀ ਤੇ ਰਹਿੰਦੇ ਕਿਰਤੀਆਂ ਨੂੰ ਲੁੱਟਣ ਵਾਲੇ ਜਨਮਜਾਤ ਲੁਟੇਰੇ। ਇਹਨਾਂ ਦਾ ਰਿਸ਼ਤਾ ਮਲਕ ਭਾਗੋਆਂ ਨਾਲ ਜਾ ਮਿਲਦਾ ਹੈ ਜਿਹਨਾਂ ਨੂੰ ਗੁਰੂਨਾਨਕ ਸਾਹਿਬ ਨੇ ਠੁਕਰਾ ਦਿੱਤਾ ਸੀ। 

ਇੱਕ ਧੜਾ ਹੋਰ ਵੀ ਹੈ ਜਿਹੜਾ ਲਕੀਰ ਦੇ ਇਸ ਪਾਸੇ ਰਹਿ ਰਹੇ ਕਿਰਤੀ ਵਰਗ ਦੇ ਖੋਹੇ ਜਾ ਰਹੇ ਹੱਕਾਂ ਲਈ ਲਗਾਤਾਰ ਸੰਘਰਸ਼ ਵੀ ਕਰਦਾ ਆ ਰਿਹਾ ਹੈ। ਇਸ ਧੜੇ ਨੇ ਹੀ ਲੁਟੇਰਿਆਂ ਅਤੇ ਜਾਬਰਾਂ ਦੇ ਖਿਲਾਫ ਲੰਮੇ ਸਮੇਂ ਤੋਂ ਸੰਘਰਸ਼ ਵਿੱਢਿਆ ਹੋਇਆ ਹੈ। ਇਸ ਸੰਘਰਸ਼ ਵਿੱਚ ਸ਼ਾਮਲ ਲਾਲ ਝੰਡੇ ਵਾਲਿਆਂ ਦੀ ਕਤਾਰ ਵਿੱਚ ਇੱਕ ਨਾਮ ਕਾਮਰੇਡ ਚਮਕੌਰ ਸਿੰਘ ਦਾ ਵੀ ਹੈ। ਚਮਕੌਰ ਸਿੰਘ ਦਾ ਪੂਰਾ ਪਰਿਵਾਰ ਉਸਦਾ ਸਾਥ ਵੀ ਦੇਂਦਾ ਹੈ। ਜਦੋਂ ਕਦੇ ਕੋਈ ਧਰਨਾ ਮੁਜ਼ਾਹਰਾ ਹੁੰਦਾ ਹੋਵੇ ਤਾਂ ਕਾਮਰੇਡ ਚਮਕੌਰ ਸਿੰਘ ਦਾ ਪੋਤਰਾ ਤਨਵੀਰ ਸਿੰਘ ਵੀ ਅਕਸਰ ਉਸਦੇ ਨਾਲ ਆ ਜਾਂਦਾ ਹੈ। ਇਨਕਲਾਬ ਜ਼ਿੰਦਾਬਾਦ ਕਹਿਣ ਵੇਲੇ ਜਾਂ ਫਾਸ਼ੀਵਾਦ ਮੁਰਦਾਬਾਦ ਕਹਿਣ ਵੇਲੇ ਉਸਦਾ ਜੋਸ਼ ਦੇਖਣ ਵਾਲਾ ਹੁੰਦਾ ਹੈ।  ਉਹ ਬੜੇ ਜੋਸ਼ ਅਤੇ ਸੁਰ ਨਾਲ ਆਖਿਆ ਕਰਦਾ ਹੈ:.

ਹੱਕ ਜਿਹਨਾਂ ਦੇ ਆਪਣੇ-ਆਪੇ ਲੈਣਗੇ ਖੋਹ!

ਕਾਮਰੇਡ ਚਮਕੌਰ ਦੇ ਇਸ ਜੋਸ਼ੀਲੇ ਪੋਤਰੇ ਤਨਵੀਰ ਸਿੰਘ ਦਾ ਜਨਮਦਿਨ 16 ਸਤੰਬਰ ਨੂੰ ਹੈ। ਇਸ ਮੌਕੇ ਇਸ ਜਨਮਦਿਨ ਨੂੰ ਮਨਾਉਣ ਦੀ ਰਸਮ ਵੀ ਲੋਕ ਪੱਖੀ ਅੰਦਾਜ਼ ਨਾਲ ਹੀ ਨਿਭਾਈ ਜਾਵੇਗੀ। 

ਨੌਜਵਾਨ ਅਤੇ ਵਿਦਿਆਰਥੀ ਫਿਰ ਮੈਦਾਨ ਵਿੱਚ ਡਟਣ ਲੱਗੇ

 ਬੁੱਧੀਜੀਵੀਆਂ ਦੀ ਰਿਹਾਈ ਲਈ ਵੀ ਕਰਨਗੇ ਜ਼ੋਰਦਾਰ ਰੋਸ ਵਖਾਵੇ  

ਲੁਧਿਆਣਾ: 23 ਜੂਨ 2020: (ਹਰਜਿੰਦਰ ਸਿੰਘ//ਲੋਕ ਮੀਡੀਆ ਮੰਚ)::

ਕੇਂਦਰ ਦੀ ਮੋਦੀ ਸਰਕਾਰ ਨੇ ਲੋਕਾਂ ਖਿਲਾਫ ਬੋਲੇ ਹੋਏ ਫਾਸ਼ੀ ਹਮਲੇ ਤਹਿਤ ਵਿਦਿਆਰਥੀ ਕਾਰਕੁੰਨਾਂ ਤੇ ਬੁੱਧੀਜੀਵੀਆਂ ਦੀਆਂ ਗ੍ਰਿਫਤਾਰੀਆਂ ਦਾ ਵੱਡਾ ਦਮਨ ਚੱਕਰ ਚਲਾਇਆ ਹੋਇਆ ਹੈ। ਕੇਂਦਰੀ ਹਕੂਮਤ ਦੇ ਹੁਕਮਾਂ ਤੇ ਦਿੱਲੀ ਤੇ ਯੂ ਪੀ ਪੁਲਿਸ  ਵੱਲੋਂ ਪਿਛਲੇ ਦੋ ਢਾਈ ਮਹੀਨਿਆਂ ਦੌਰਾਨ ਅਜਿਹੇ ਦਰਜਨਾਂ ਵਿਦਿਆਰਥੀ ਕਾਰਕੁੰਨਾਂ ਨੂੰ ਗ੍ਰਿਫ਼ਤਾਰ ਕੀਤਾ ਗਿਆ ਹੈ ਜਿਹੜੇ ਸੀ.ਏ.ਏ. ਵਿਰੋਧੀ ਅੰਦੋਲਨ ਦੌਰਾਨ ਮੂਹਰਲੀਆਂ ਸਫਾਂ ਵਿਚ ਰਹਿ ਕੇ ਜੂਝ ਰਹੇ ਸਨ। ਦਰਜਨ ਤੋਂ ਉੱਪਰ ਬੁੱਧੀਜੀਵੀਆਂ ਤੇ ਜਮਹੂਰੀ ਹੱਕਾਂ ਦੇ ਕਾਰਕੁੰਨਾਂ ਨੂੰ ਪਹਿਲਾਂ ਹੀ ਝੂਠੇ ਕੇਸ ਮੜ੍ਹ ਕੇ ਜੇਲ੍ਹਾਂ ਵਿੱਚ ਸੁੱਟਿਆ ਹੋਇਆ ਹੈ । ਇਨ੍ਹਾਂ ਸਭਨਾਂ ਦੀ ਰਿਹਾਈ ਲਈ ਤੇ ਝੂਠੇ ਕੇਸ ਰੱਦ ਕਰਨ ਦੀ ਮੰਗ ਲਈ ਨੌਜਵਾਨ ਭਾਰਤ ਸਭਾ ਤੇ ਪੰਜਾਬ ਸਟੂਡੈਂਟਸ ਯੂਨੀਅਨ (ਸ਼ਹੀਦ ਰੰਧਾਵਾ ) ਦੇ ਸਰਗਰਮਾਂ ਵੱਲੋਂ 25 ਜੂਨ ਨੂੰ ਪੰਜਾਬ ਵਿੱਚ ਵੱਖ-ਵੱਖ ਥਾਵਾਂ ਤੇ ਪ੍ਰਦਰਸ਼ਨ ਕੀਤੇ ਜਾਣਗੇ।ਦੋਵਾਂ ਜਥੇਬੰਦੀਆਂ ਨੇ ਸੂਬੇ ਦੇ ਜਮਹੂਰੀ ਹਲਕਿਆਂ ਨੂੰ ਸੱਦਾ ਦਿੱਤਾ ਹੈ ਕਿ ਉਹ ਇਸ ਹਕੂਮਤੀ ਜਬਰ ਖਿਲਾਫ਼ ਜ਼ੋਰਦਾਰ ਆਵਾਜ਼ ਬੁਲੰਦ ਕਰਨ ਤੇ ਇਨ੍ਹਾਂ ਪ੍ਰਦਰਸ਼ਨਾਂ ਚ ਸ਼ਮੂਲੀਅਤ ਕਰਨ।

     ਪ੍ਰੈੱਸ ਦੇ ਨਾਮ ਬਿਆਨ ਜਾਰੀ ਕਰਦਿਆਂ ਦੋਹਾਂ ਜਥੇਬੰਦੀਆਂ ਦੇ ਸੂਬਾਈ ਆਗੂਆਂ ਅਸ਼ਵਨੀ ਕੁਮਾਰ ਅਤੇ ਹੁਸ਼ਿਆਰ ਸਲੇਮਗੜ੍ਹ ਨੇ ਕਿਹਾ ਕਿ ਦਿੱਲੀ ਤੇ ਯੂ ਪੀ ਦੀਆਂ ਜਾਮੀਆ ਮਿਲੀਆ ਇਸਲਾਮੀਆਂ ਯੂਨੀਵਰਸਿਟੀ ਤੇ ਅਲੀਗੜ੍ਹ ਮੁਸਲਿਮ ਯੂਨੀਵਰਸਿਟੀ ਦੇ ਦਰਜਨਾਂ ਕਾਰਕੁੰਨਾਂ ਨੂੰ ਲਾਕਡਾਊਨ ਤੇ ਕਰਫਿਊ ਦੀ ਦਹਿਸ਼ਤ ਦੇ ਦੌਰਾਨ ਗ੍ਰਿਫਤਾਰ ਕਰਕੇ ਜੇਲ੍ਹੀਂ ਸੁੱਟ ਦਿੱਤਾ ਗਿਆ ਹੈ। ਸੀ.ਏ.ਏ.ਵਿਰੋਧੀ ਸੰਘਰਸ਼ ਦੌਰਾਨ ਮੋਦੀ ਹਕੂਮਤ ਖ਼ਿਲਾਫ਼ ਬੇਖੌਫ਼ ਨਿੱਤਰਨ ਵਾਲੇ ਇਨ੍ਹਾਂ ਵਿਦਿਆਰਥੀਆਂ ਨੂੰ ਸਬਕ ਸਿਖਾਉਣ ਦੇ ਮਨਸ਼ੇ ਨਾਲ ਅਜਿਹਾ ਜਬਰ ਕੀਤਾ ਜਾ ਰਿਹਾ ਹੈ ।ਦੇਸ਼ ਧ੍ਰੋਹ ਦੇ ਕੇਸਾਂ ਨੂੰ ਸੱਤ ਇਕਵੰਜਾ ਵਾਂਗ ਵਰਤਿਆ ਜਾ ਰਿਹਾ ਹੈ। ਗ੍ਰਿਫਤਾਰ ਕੀਤੇ ਗਏ ਵਿਦਿਆਰਥੀਆਂ ਵਿੱਚ ਇੱਕ ਗਰਭਵਤੀ ਲੜਕੀ ਸਫੂਰਾ ਜਰਗਰ ਵੀ ਹੈ ਜੋ ਹੁਣ ਕਰੋਨਾ ਸੰਕਟ ਦਰਮਿਆਨ ਰਾਹਤ ਕਾਰਜਾਂ ਵਿੱਚ ਜੁਟੀ ਹੋਈ ਸੀ ।ਇਨ੍ਹਾਂ ਕਾਰਕੁੰਨਾਂ ਨੂੰ ਦਿੱਲੀ ਫਿਰਕੂ ਹਿੰਸਾ ਲਈ ਦੋਸ਼ੀਆਂ ਵਜੋਂ ਕੇਸਾਂ  'ਚ ਫਸਾਇਆ ਜਾ ਰਿਹਾ ਹੈ ਜਦਕਿ ਹਿੰਸਾ ਭੜਕਾਉਣ ਤੇ ਕਤਲੇਆਮ ਰਚਾਉਣ ਦੇ ਦੋਸ਼ੀ ਕਪਿਲ ਮਿਸ਼ਰੇ ਵਰਗਿਆਂ ਵੱਲ ਉਂਗਲ ਤੱਕ ਨਹੀਂ ਕੀਤੀ ਗਈ। ਇਨ੍ਹਾਂ ਗ੍ਰਿਫ਼ਤਾਰੀਆਂ ਤੇ ਕੇਸਾਂ ਰਾਹੀਂ ਮੋਦੀ ਸਰਕਾਰ ਮੁਲਕ ਭਰ ਦੇ ਨੌਜਵਾਨਾਂ ਨੂੰ ਫਾਸ਼ੀ ਹਮਲੇ ਖਿਲਾਫ ਨਿਤਰਨ ਤੋਂ ਵਰਜਣਾ ਚਾਹੁੰਦੀ ਹੈ ਤੇ ਨੌਜਵਾਨ ਵਿਦਿਆਰਥੀਆਂ ਦੇ ਮਨਾਂ ਵਿਚ ਖੌਫ ਪੈਦਾ ਕਰਨਾ ਚਾਹੁੰਦੀ ਹੈ। ਪੰਜਾਬ ਦੇ ਨੌਜਵਾਨਾਂ ਦੇ ਇਹ ਪ੍ਰਦਰਸ਼ਨ ਖੌਫ਼ਜ਼ਦਾ ਹੋਣ ਤੋਂ ਇਨਕਾਰ ਕਰਨ ਤੇ ਜ਼ੁਲਮ ਖਿਲਾਫ ਡਟਣ ਦੀ ਸੰਗਰਾਮੀ ਵਿਰਾਸਤ ਬੁਲੰਦ ਕਰਨ ਦਾ ਹੋਕਾ ਵੀ ਹੋਣਗੇ।

        ਆਗੂਆਂ ਨੇ ਕਿਹਾ ਕਿ ਮੋਦੀ ਹਕੂਮਤ ਦੇ ਫਾਸ਼ੀ ਹਮਲੇ ਖ਼ਿਲਾਫ਼ ਗੂੰਜਦੀ ਆ ਰਹੀ ਬੁੱਧੀਜੀਵੀਆਂ ਅਤੇ ਜਮਹੂਰੀ ਹੱਕਾਂ ਦੇ ਕਾਰਕੁਨਾਂ ਦੀ ਆਵਾਜ਼ ਨੂੰ ਬੰਦ ਕਰਨ ਲਈ ਹੀ ਮੁਲਕ ਦੇ ਨਾਮੀ ਬੁੱਧੀਜੀਵੀਆਂ ਨੂੰ ਜੇਲ੍ਹੀਂ ਡੱਕਿਆ ਜਾ ਰਿਹਾ ਹੈ। ਭੀਮਾ ਕੋਰੇਗਾਓਂ ਦੇ ਝੂਠੇ ਕੇਸ ਚ ਨਿੱਤ ਰੋਜ਼ ਨਵੇਂ ਨਵੇਂ ਨਾਮ ਸ਼ਾਮਿਲ ਕਰਕੇ ਦੇਸ਼ ਧਰੋਹ ਦੇ ਕੇਸ ਮੜ੍ਹੇ ਜਾ ਰਹੇ ਹਨ। ਜੇਲ੍ਹਾਂ ਚ ਸੁੱਟੇ ਗਏ ਇਨ੍ਹਾਂ ਬੁੱਧੀਜੀਵੀਆਂ ਚੋਂ ਵੱਡਾ ਹਿੱਸਾ ਵਡੇਰੀ ਉਮਰ ਤੇ ਗੰਭੀਰ ਬੀਮਾਰੀਆਂ ਦਾ ਸ਼ਿਕਾਰ ਹੋਣ ਕਰਕੇ ,ਕਰੋਨਾ ਬਿਮਾਰੀ ਦੇ ਖ਼ਤਰੇ ਹੇਠ ਆਉਣ ਵਾਲੇ ਗਰੁੱਪ 'ਚ ਸ਼ੁਮਾਰ ਹੁੰਦਾ ਹੈ, ਪਰ ਇਸ ਸਭ ਦੀ ਪ੍ਰਵਾਹ ਕੀਤੇ ਬਿਨਾਂ ਇਨ੍ਹਾਂ ਕਾਰਕੁਨਾਂ ਨੂੰ ਜ਼ਮਾਨਤ ਦੇਣ ਤੋਂ ਇਨਕਾਰ ਕੀਤਾ ਗਿਆ ਹੈ ਜਦਕਿ ਇੱਕ ਪਾਸੇ ਜੇਲ੍ਹਾਂ ਚੋਂ ਕੈਦੀ ਘਟਾਉਣ ਦੇ ਕਦਮ ਲਏ ਜਾ ਰਹੇ ਹਨ। ਹਕੂਮਤੀ ਪਹੁੰਚ ਇਨ੍ਹਾਂ ਨੂੰ ਕਦਮ ਦਰ ਕਦਮ ਮੌਤ ਵੱਲ ਧੱਕਣ ਵਾਲੀ ਹੈ। ਜੀ.ਐੱਨ. ਸਾਈਂ ਬਾਬਾ ਤੇ ਵਰਵਰਾ ਰਾਓ ਵਰਗੇ ਕਾਰਕੁੰਨਾਂ ਨੂੰ ਇਲਾਜ ਖੁਣੋਂ ਹੀ ਮਰਨ ਲਈ ਸੁੱਟਿਆ ਜਾ ਰਿਹਾ ਹੈ। ਜਾਣ ਬੁੱਝ ਕੇ ਮੁਲਕ ਦੀਆਂ ਦੂਰ ਦੁਰਾਡੇ ਦੀਆਂ ਜੇਲ੍ਹਾਂ 'ਚ ਭੇਜਿਆ ਗਿਆ ਹੈ ਤਾਂ ਕਿ ਪਰਿਵਾਰਾਂ ਦੀ ਪਹੁੰਚ ਵੀ ਨਾ ਹੋ ਸਕੇ।ਇਨ੍ਹਾਂ ਨੂੰ ਮਹਾਂਰਾਸ਼ਟਰ ਦੀਆਂ ਤੂੜੀਆਂ ਪਈਆਂ ਜੇਲ੍ਹਾਂ 'ਚ ਡੱਕਿਆ ਹੋਇਆ ਹੈ ਜਿੱਥੇ ਬਿਮਾਰੀ ਦੀ ਲਾਗ ਦਾ ਖਤਰਾ ਸਭ ਤੋਂ ਜ਼ਿਆਦਾ ਹੈ। ਇਹ ਸਾਰਾ ਜ਼ੁਲਮ ਇਨ੍ਹਾਂ ਕਾਰਕੁੰਨਾਂ ਦਾ ਮਨੋਬਲ ਤੋੜਨ ਤੇ ਦੇਸ਼ ਦੇ ਬੁੱਧੀਜੀਵੀ ਵਰਗ ਨੂੰ ਸੁਣਾਉਣੀ ਕਰਨ ਲਈ ਹੈ ਕਿ ਉਹ ਹੱਕ-ਸੱਚ ਲਈ ਬੋਲਣ ਦਾ ਆਪਣਾ ਫਰਜ਼ ਨਿਭਾਉਣੋਂ ਹਟ ਜਾਣ। ਇਹ ਸਾਰੀਆਂ ਆਵਾਜ਼ਾਂ ਉਹ ਹਨ ਜੋ ਮੁਲਕ ਦੇ ਸਭ ਤੋਂ ਵਧੇਰੇ ਦਬਾਏ ਆਦਿਵਾਸੀਆਂ, ਦਲਿਤਾਂ, ਔਰਤਾਂ ਤੇ ਹਰ ਤਰ੍ਹਾਂ ਦੇ ਕਿਰਤੀ ਕਾਮਿਆਂ ਦੇ ਹੱਕ 'ਚ ਉੱਠਦੀਆਂ ਆ ਰਹੀਆਂ ਹਨ ਤੇ ਵੱਡੇ ਸਰਮਾਏਦਾਰਾਂ, ਦੇਸੀ-ਵਿਦੇਸ਼ੀ ਕੰਪਨੀਆਂ ਅਤੇ ਇਨ੍ਹਾਂ ਦੀਆਂ ਸੇਵਾਦਾਰ ਹਕੂਮਤਾਂ ਦੇ ਜ਼ੁਲਮਾਂ ਖ਼ਿਲਾਫ਼ ਉੱਠਦੀਆਂ ਆ ਰਹੀਆਂ ਹਨ। ਮੋਦੀ ਹਕੂਮਤ ਦੇ ਫਿਰਕੂ ਫਾਸ਼ੀ ਹਮਲੇ ਮੂਹਰੇ ਮੁਲਕ ਦੇ ਬੁੱਧੀਜੀਵੀ ਤੇ ਜਮਹੂਰੀ ਕਾਮੇ ਡਟ ਕੇ ਖਲੋ ਗਏ ਹਨ ਤੇ ਇਸੇ ਕਰਕੇ ਮੋਦੀ ਹਕੂਮਤ  ਦੇ ਚੋਟ ਨਿਸ਼ਾਨੇ ਤੇ ਹਨ ।ਦੁਨੀਆਂ ਦੇ ਨਾਮੀ ਬੁੱਧੀਜੀਵੀਆਂ ਤੇ ਜਮਹੂਰੀ ਹਲਕਿਆਂ ਵੱਲੋਂ ਮੋਦੀ ਹਕੂਮਤ ਦੇ ਇਸ ਜ਼ੁਲਮ ਖ਼ਿਲਾਫ਼ ਆਵਾਜ਼ ਉਠਾਈ ਜਾ ਰਹੀ ਹੈ ਤੇ ਇਨ੍ਹਾਂ ਕਾਰਕੁੰਨਾਂ ਨੂੰ ਰਿਹਾਅ ਕਰਨ ਦੀ ਮੰਗ ਕੀਤੀ ਜਾ ਰਹੀ ਹੈ ਪਰ ਇਹ ਸਰਕਾਰ ਹਰ ਤਰ੍ਹਾਂ ਦੀ ਆਵਾਜ਼ ਨੂੰ ਅਣਸੁਣੀ ਕਰਦੀ ਆ ਰਹੀ ਹੈ।

      ਦੋਹਾਂ ਜਥੇਬੰਦੀਆਂ ਨੇ ਸਾਂਝੇ ਤੌਰ ਤੇ ਕਿਹਾ ਕਿ ਮੋਦੀ ਹਕੂਮਤ ਦੇ ਸਮੁੱਚੇ ਫਿਰਕੂ ਫਾਸ਼ੀ ਹਮਲੇ ਦਾ ਮਕਸਦ ਦੇਸੀ ਵਿਦੇਸ਼ੀ ਧਨਾਢਾਂ ਲਈ ਮੁਲਕਾਂ ਨੂੰ ਲੁਟਾਉਣਾ ਹੈ ।ਕਰੋਨਾ ਸੰਕਟ ਦੀ ਆੜ ਲੈ ਕੇ ਲੋਕਾਂ ਦੇ ਹਿੱਤਾਂ ਤੇ ਬੋਲਿਆ ਆਰਥਿਕ ਹੱਲਾ ਅਤੇ ਹੋਰ ਤੇਜ਼ ਕੀਤਾ ਗਿਆ ਜਾਬਰ ਹੱਲਾ ਇਹੀ ਦੱਸਦਾ ਹੈ।  ਇਸ ਹਮਲੇ ਖ਼ਿਲਾਫ਼ ਮੁਲਕ ਦੇ ਲੋਕਾਂ ਨੂੰ ਇਕਜੁੱਟ ਹੋ ਕੇ ਨਿਤਰਨਾ ਚਾਹੀਦਾ ਹੈ।

       25 ਜੂਨ ਨੂੰ ਬਠਿੰਡਾ, ਸੁਨਾਮ, ਮੂਣਕ, ਨਿਹਾਲ  ਸਿੰਘ ਵਾਲਾ ਅਤੇ ਲੁਧਿਆਣਾ ਵਿਖੇ ਹੋਣ ਵਾਲੇ ਇਨ੍ਹਾਂ ਪ੍ਰਦਰਸ਼ਨਾਂ ਵਿੱਚ ਨੌਜਵਾਨ-ਵਿਦਿਆਰਥੀਆਂ ਅਤੇ ਸਭਨਾਂ ਜਮਹੂਰੀ ਹਲਕਿਆਂ ਨੂੰ ਸ਼ਾਮਲ ਹੋਣ ਦਾ ਸੱਦਾ ਦਿੱਤਾ ਜਾਂਦਾ ਹੈ।

ਤਰਕਸ਼ੀਲ ਸੁਸਾਇਟੀ ਵਲੋਂ ਵੀ ਦੀਵੇ ਜਗਾਉਣ ਦੇ ਬਿਆਨ 'ਤੇ ਤਿੱਖਾ ਪ੍ਰਤੀਕਰਮ

4th April 4 at 2020 at 5:09 PM

ਦੀਵੇ ਜਗਾਕੇ ਕਰੋਨਾ ਭਜਾਉਣ ਦੇ ਬਿਆਨ ਪੂਰੀ ਤਰਾਂ ਗੈਰ ਵਿਗਿਆਨਕ 

ਲੁਧਿਆਣਾ: 4 ਅਪਰੈਲ 2020: (ਲੋਕ ਮੀਡੀਆ ਮੰਚ ਬਿਊਰੋ):: 

ਦੇਸ਼ ਦੇ ਪ੍ਰਧਾਨ ਮੰਤਰੀ ਸ੍ਰੀ ਨਰਿੰਦਰ ਮੋਦੀ ਵਲੋਂ ਟੈਲੀਵਿਜ਼ਨ ਉਪਰ ਦੇਸ਼ ਵਾਸੀਆਂ ਨੂੰ ਦਿਤੇ ਸੰਦੇਸ਼ ਵਿੱਚ 5 ਅਪ੍ਰੈਲ ਨੂੰ ਰਾਤ 9 ਵਜੇ 9 ਮਿੰਟ ਲਈ ਬਤੀਆਂ ਬੰਦ ਕਰਕੇ ਦੀਵੇ, ਟਾਰਚ ਜਗਾ ਕੇ ਕਰੋਨਾ ਭਜਾਉਣ ਦੇ ਗੈਰ ਵਿਗਿਆਨਕ ਬਿਆਨ ਨੂੰ ਤਰਕਸ਼ੀਲ ਸੁਸਾਇਟੀ ਪੰਜਾਬ ਨੇ ਹਾਸੋਹੀਣਾ ਕਰਾਰ ਦਿੱਤਾ ਹੈ। ਸੁਸਾਇਟੀ ਦੇ ਜ਼ੋਨ ਲੁਧਿਆਣਾ ਦੇ ਜੱਥੇਬੰਦਕ ਮੁੱਖੀ ਜਸਵੰਤ ਜੀਰਖ, ਵਿੱਤ ਮੁੱਖੀ ਆਤਮਾ ਸਿੰਘ, ਇਕਾਈ ਮੁੱਖੀ ਬਲਵਿੰਦਰ ਸਿੰਘ ਸਮੇਤ ਸਤੀਸ਼ ਸੱਚਦੇਵਾ, ਧਰਮਪਾਲ ਸਿੰਘ ਵਲੋਂ ਤਿਖੀ ਆਲੋਚਨਾ ਕੀਤੀ ਹੈ। ਪ੍ਰੈਸ ਨੂੰ ਦਿਤੇ ਬਿਆਨ ਰਾਹੀਂ ਆਗੂਆਂ ਨੇ ਕਿਹਾ ਕਿ ਕਰੋਨਾ ਬਿਮਾਰੀ ਨਾਲ ਪੂਰੀ ਦੁਨੀਆ ਦੇ ਦੇਸ਼ ਆਪਣੇ ਨਾਗਰਿਕਾਂ ਨੂੰ ਬਚਾਉਣ ਲਈ ਨਵੇਂ ਹਸਪਤਾਲ ਬਣਾਉਣ ਦੇ ਐਲਾਨ ਕਰ ਰਹੇ ਹਨ, ਮਰੀਜ਼ਾਂ ਲਈ ਵੈਂਟੀਲੈਂਟਰਾਂ ਦੀ ਘਾਟ ਪੂਰੀ ਕਰਨ ਲਈ ਪ੍ਰਬੰਧ ਕਰ ਰਹੇ ਹਨ, ਬੇਰੋਜ਼ਗਾਰ ਹੋਏ ਨਾਗਰਿਕਾਂ ਲਈ ਆਰਥਿਕ ਸਹਾਇਤਾ ਦੇ ਐਲਾਨ ਕਰ ਰਹੇ ਹਨ। ਅਜਿਹੇ ਹਾਲਾਤਾਂ ਵਿਚ ਸਾਡੇ ਦੇਸ਼ ਦੇ ਪ੍ਰਧਾਨ ਮੰਤਰੀ ਵਲੋਂ ਦੀਵੇ ਜਗਾਉਣ ਨਾਲ ਕਰੋਨਾ ਭਜਾਉਣ ਦੇ ਬਿਆਨ ਦੇ ਕੇ ਅੰਧ ਵਿਸ਼ਵਾਸ਼ ਨੂੰ ਵਧਾਉਣ ਦਾ ਯਤਨ ਕੀਤਾ ਜਾ ਰਿਹਾ ਹੈ। ਉਹਨਾਂ ਪ੍ਰਧਾਨ ਮੰਤਰੀ ਜੀ ਵੱਲੋਂ ਇਹ ਕਹਿਣਾ ਕਿ “ਕਰੋਨਾ ਦੀ ਚਾਇਨ ( ਲੜੀ ) ਤੋੜਨ ਲਈ ਇਹੋ ਰਾਮ ਬਾਣ ਇਲਾਜ ਹੈ “ ਨੂੰ ਅੰਧਵਿਸ਼ਵਾਸੀ ਕਰਾਰ ਦਿੱਤਾ। ਲੋਕਾਂ ਨੂੰ ਅਪੀਲ ਕਰਦਿਆਂ ਕਿਹਾ ਕਿ ਉਹ ਅਜਿਹੇ ਕਿਸੇ ਵੀ ਗੈਰ ਵਿਗਿਆਨਕ ਕੰਮ ਨੂੰ ਨਾ ਕਰਨ। ਆਗੂਆਂ ਨੇ ਪ੍ਰਧਾਨ ਮੰਤਰੀ ਤੋਂ ਵੀ ਮੰਗ ਕੀਤੀ ਕਿ ਦੇਸ਼ ਦੀ ਇਸ ਸੰਕਟ ਦੀ ਘੜੀ ਵਿੱਚ ਅੰਧਵਿਸ਼ਵਾਸਾਂ ਨੂੰ ਵਧਾਉਣ ਦੀ ਥਾਂ ਦੇਸ਼ ਦੇ ਲੋਕਾਂ ਲਈ ਲੜ ਰਹੇ ਡਾਕਟਰਾਂ/ਸਿਹਤ ਕਰਮਚਾਰੀਆਂ ਨੂੰ ਸੁਰੱਖਿਆ ਦਾ ਸਮਾਨ ਮਹੱਈਆ ਕਰਨ ਦੀ ਗੱਲ ਕਰਨ। ਬੇਰੋਜ਼ਗਾਰ ਹੋਏ ਨਾਗਰਿਕਾਂ ਲਈ ਆਰਥਿਕ ਸਹਾਇਤਾ ਦਾ ਐਲਾਨ ਕਰਨ। ਦੇਸ਼ ਵਾਸੀਆਂ ਨੂੰ ਇਹ ਦਸਣ ਦੀ ਖੇਚਲ ਕਰਨ ਕਿ ਨਵੇਂ ਹਸਪਤਾਲ ਕਿੰਨੇ ਬਣਾਉਣ ਦੀ ਯੋਜਨਾ ਹੈ? ਕਿੰਨੇ ਵੈਂਟੀਲੇਟਰਾਂ ਦੀ ਜ਼ਰੂਰਤ ਹੈ ਅਤੇ ਕਿੰਨੇ ਇਸ ਆਫ਼ਤ ਲਈ ਹੋਰ ਖਰੀਦੇ ਹਨ? ਮਜ਼ਦੂਰਾਂ ਲਈ ਖਾਧ ਖ਼ੁਰਾਕ ਅਤੇ ਆਰਥਿਕ ਸਹਾਇਤਾ ਕਿਵੇਂ ਪੁਜਦੀ ਕੀਤੀ ਜਾਵੇਗੀ? ਉਹਨਾਂ ਅੱਗੇ ਕਿਹਾ ਕਿ ਥਾਲੀਆਂ, ਤਾੜੀਆਂ, ਟੱਲੀਆਂ ਤੇ ਘੰਟੀਆਂ ਬਜਾਉਣਾ ਇਸ ਸਮੱਸਿਆ ਦਾ ਇਲਾਜ ਨਹੀਂ ਤੇ ਨਾ ਹੀ ਇਸ ਤਰ੍ਹਾਂ ਕਰਨ ਨਾਲ ਭੁੱਖੇ ਢਿੱਡ ਬੈਠੇ ਲੋਕਾਂ ਦਾ ਮਨੋਬਲ ਉੱਚਾ ਹੋਣਾ ਹੈ। ਆਗੂਆਂ ਮੰਗ ਕੀਤੀ ਕਿ ਇਸ ਸੰਕਟ ਦੀ ਘੜੀ ਵਿੱਚ ਖ਼ਜ਼ਾਨੇ ਦਾ ਮੂੰਹ ਸਿਹਤ ਸੇਵਾਵਾਂ ਅਤੇ ਗਰੀਬਾਂ ਵਲ ਕੀਤਾ ਜਾਵੇ।

ਲੁਧਿਆਣਾ 'ਚ ਕੇਂਦਰ ਸਰਕਾਰ ਖਿਲਾਫ ਰੋਸ਼ ਪ੍ਰਦਰਸ਼ਨ, ਫੁਕਿਆ ਪੁਤਲਾ

ਅਨੁਰਾਗ ਠਾਕੁਰ ਦੀ ਧਮਕੀ ਤੋਂ ਬਾਅਦ ਹੀ ਚੱਲੀਆਂ ਜਾਮੀਆ 'ਚ ਗੋਲੀਆਂ 

ਫੀਲਡ ਗੰਜ ਚੌਂਕ ਵਿੱਖੇ ਕੇਂਦਰ ਸਰਕਾਰ ਦਾ ਪੁਤਲਾ ਫੁਕ ਕੇ ਪ੍ਰਦਰਸ਼ਨ ਕਰਦੇ ਹੋਏ ਮਜਲਿਸ ਅਹਿਰਾਰ ਇਸਲਾਮ ਦੇ  ਵਰਕਰ

ਲੁਧਿਆਣਾ: 31 ਜਨਵਰੀ 2020: (ਐਮ ਐਸ ਭਾਟੀਆ//ਲੋਕ ਮੀਡੀਆ ਮੰਚ):: 

ਅੱਜ ਇੱਥੇ ਫੀਲਡ ਗੰਜ ਚੌਂਕ  ਵਿਖੇ ਮਜਲਿਸ ਅਹਿਰਾਰ ਇਸਲਾਮ ਵੱਲੋਂ ਸੀ.ਏ.ਏ. ਅਤੇ ਐਨ.ਆਰ.ਸੀ. ਖਿਲਾਫ ਪ੍ਰਦਰਸ਼ਨ ਕਰਦੇ ਹੋਏ ਕੇਂਦਰ  ਸਰਕਾਰ ਦਾ ਪੁੱਤਲਾ ਫੁਕਿਆ ਤੇ ਜ਼ੋਰਦਾਰ ਨਾਰੇਬਾਜ਼ੀ ਕਰਕੇ ਰੋਸ਼ ਪ੍ਰਗਟਾਇਆ। ਸ਼ਾਹੀ ਇਮਾਮ ਪੰਜਾਬ ਮੌਲਾਨਾ ਹਬੀਬ ਉਰ ਰਹਿਮਾਨ ਸਾਨੀ ਲੁਧਿਆਣਵੀ ਨੇ ਕਿਹਾ ਕਿ ਕੇਂਦਰੀ ਮੰਤਰੀ ਅਨੁਰਾਗ ਠਾਕੁਰ ਗੋਲੀਆਂ ਚਲਾਉਣ ਦੀਆਂ ਧੱਮਕੀਆਂ ਦੇ ਕੇ ਕੀ ਦੇਸ਼ ਵਿੱਚ ਦੰਗਾ ਕਰਵਾਉਣਾ ਚਾਹੁੰਦਾ ਹੈ? ਉਹਨਾਂ ਕਿਹਾ ਕਿ ਕੇਂਦਰੀ ਮੰਤਰੀ ਦਿੱਲੀ ਦੀ ਸਿਆਸਤ ਨੂੰ ਧਰਮ ਅਤੇ ਜਾਤਿ ਦੇ ਰੰਗ ਵਿੱਚ ਰੰਗਣ  ਲਈ  ਇਸ ਹੱਦ  ਤੱਕ ਗਿਰ ਗਏ ਹਨ ਕਿ ਵਿਕਾਸ ਦੀ ਬਜਾਏ ਨਫ਼ਰਤ ਦੀਆਂ ਗੱਲਾਂ ਕਰਨ ਲੱਗ ਪਏ ਹਨ। ਸ਼ਾਹੀ ਇਮਾਮ ਨੇ ਕਿਹਾ ਕਿ ਅਨੁਰਾਗ ਠਾਕੁਰ ਮੋਦੀ ਸਰਕਾਰ ਦਾ ਹਿੱਸਾ ਹੈ ਤੇ  ਉਹ ਦੇਸ਼ 'ਚ ਲੋਕਤੰਤਰ ਦੀ ਹੱਤਿਆ ਦੀ ਧਮਕੀ ਦੇ ਸਕਦੇ ਹਨ ਅਤੇ ਸ਼ਾਂਤਮਈ ਢੱਗ ਨਾਲ ਪ੍ਰਦਰਸ਼ਨ ਕਰਨ ਵਾਲੇ ਸ਼ਾਹੀਨ  ਬਾਗ ਦੇ ਲੋਕ ਜੇਕਰ ਅਜਿਹਾ ਕੁਝ ਕਹਿ ਦੇਣ ਤਾਂ ਉਹਨਾਂ ਤੇ ਤੁਰੰਤ ਮੁੱਕਦਮਾ ਦਰਜ਼ ਹੋ ਜਾਂਦਾ ਹੈ। ਸ਼ਾਹੀ ਇਮਾਮ ਨੇ ਕਿਹਾ ਕਿ ਕੇਂਦਰ ਦੀ ਭਾਜਪਾ ਸਰਕਾਰ ਇਹ ਨਾ ਭੁੱਲੇ ਕਿ ਇਹ ਦੇਸ਼ ਸਾਰਿਆਂ ਦਾ ਹੈ ਤੇ ਇੱਥੇ ਸੰਵਿਧਾਨ ਦਾ ਰਾਜ ਹੈ। ਲੋਕਤੰਤਰ 'ਚ ਸੱਤਾ ਵਾਲਿਆਂ ਨੂੰ ਕਾਨੂੰਨ ਹੱਥ 'ਚ ਲੈ ਕੇ ਗੁੰਡਾ ਗਰਦੀ ਕਰਨ ਦੀ ਇਜਾਜਤ ਨਹੀਂ ਹੈ। ਉਹਨਾਂ ਕਿਹਾ ਕਿ ਦੁੱਖ ਦੀ ਗੱਲ ਹੈ ਕਿ ਸਾਰਿਆਂ ਦਾ ਸਾਥ ਅਤੇ ਸਾਰਿਆਂ ਦੇ ਵਿਕਾਸ ਦੀ ਗੱਲ ਕਰਨ ਵਾਲੇ ਸਾਡੇ ਦੇਸ਼ ਦੇ ਪ੍ਰਧਾਨਮੰਤਰੀ ਨਰਿੰਦਰ ਭਾਈ ਮੋਦੀ ਵੀ ਅਨੁਰਾਗ ਠਾਕੁਰ ਦੀ ਧਮਕੀ 'ਤੇ ਚੁੱਪੀ ਧਾਰੀ ਬੈਠੇ ਹਨ। ਕਿੰਨਾਂ ਚੰਗਾਂ ਹੁੰਦਾ ਕਿ ਉਹ ਆਪਣੇ ਮੰਤਰੀ 'ਤੇ ਕਾਰਵਾਈ ਕਰਕੇ ਲੋਕਾਂ ਨੂੰ ਭਰੋਸਾ ਦਵਾਉਂਦੇ?  ਲੇਕਿਨ ਇੱਥੇ ਤਾਂ ਸੰਪ੍ਰਦਾਇਕ ਭੇਦਭਾਵ ਕਰਨ ਵਾਲਿਆਂ ਨੂੰ ਹੀ ਵੱਡੇ ਵੱਡੇ ਅਹੁੱਦੇ ਦੇ ਦਿੱਤੇ ਜਾਂਦੇ ਹਨ। ਸ਼ਾਹੀ ਇਮਾਮ ਨੇ ਕਿਹਾ ਕਿ ਕੱਲ ਜਾਮੀਆ 'ਚ ਇੱਕ ਗੁੰਡਾ ਅਨਸਰ ਵੱਲੋਂ ਚਲਾਈ ਗਈ ਗੋਲੀ ਇਸ ਗੱਲ ਦਾ ਸੰਕੇਤ ਦਿੰਦੀ ਹੈ ਕਿ ਸੱਤਾਧਾਰੀ ਉਹਨਾਂ ਸਾਰੇ ਸ਼ਰਾਰਤੀ ਤੱਤਾਂ ਨੂੰ ਹੋਰ ਪ੍ਰਫੁਲਤ ਕਰਦੇ ਹਨ ਜੋ ਸਮਾਮ ਵਿੱਚ ਖੂਨ ਖਰਾਬਾ ਕਰਕੇ ਦੇਸ਼ ਦਾ ਮਾਹੌਲ ਖਰਾਬ ਕਰਨਾ ਚਾਹੁੰਦੇ ਹਨ। ਉਹਨਾਂ ਕਿਹਾ ਕਿ ਅਸੀਂ ਸਾਰੇ ਭਾਰਤੀ ਇਸ ਗੱਲ ਨੂੰ ਕਦੇ ਵੀ ਬਰਦਾਸ਼ਤ ਨਹੀਂ ਕਰਾਂਗੇ। ਜਿਕਰਯੋਗ ਹੈ ਕਿ ਕੇਂਦਰੀ ਮੰਤਰੀ ਅਨੁਰਾਗ ਠਾਕੁਰ ਦਿੱਲੀ ਚੋਣਾਂ  ਵਿੱਚ ਗੋਲੀ ਮਾਰਨ ਦੀ ਧਮਕੀ ਦੇ ਬਾਅਦ ਜਾਮੀਆ ਮਿੱਲਿਆ 'ਚ ਇੱਕ ਦੰਗਈ ਵੱਲੋਂ ਗੋਲਾ ਚਲਾ ਕੇ ਇਕ ਵਿਦਿਆਰਥੀ ਨੂੰ ਜਖ਼ਮੀ ਕਰਨ ਦੇ ਖਿਲਾਫ ਅੱਜ ਲੁਧਿਆਣਾ ਵਿਖੇ ਰੋਸ਼ ਪ੍ਰਦਰਸ਼ਨ ਕੀਤਾ ਗਿਆ।

ਪੀਪਲਜ਼ ਮੀਡੀਆ ਲਿੰਕ ਵੱਲੋਂ ਬਹੁਤ ਜ਼ਰੂਰੀ ਸੱਦਾ

ਮੀਡੀਆ ਤੇ ਹੋ ਰਹੇ ਹਮਲਿਆਂ ਨੂੰ ਰੋਕਣ ਲਈ ਇੱਕ ਹੋਣਾ ਬੇਹੱਦ ਜ਼ਰੂਰੀ 

ਇਹ ਫੋਟੋ ਧੰਨਵਾਦ ਸਹਿਤ--ਵੀਡੀਓ ਦੇਖਣ ਲਈ ਇਥੇ ਕਲਿੱਕ ਕਰੋ 

ਚੰਡੀਗੜ੍ਹ//ਲੁਧਿਆਣਾ//ਜਲੰਧਰ: 16 ਜਨਵਰੀ 2020: (ਲੋਕ ਮੀਡੀਆ ਮੰਚ)::

ਮੀਡੀਆ ਦਾ ਸੰਕਟ ਲਗਾਤਾਰ ਗੰਭੀਰ ਹੋ ਰਿਹਾ ਹੈ। ਸਮਾਜ ਦੀ ਕੋਈ ਧਿਰ ਨਹੀਂ ਜਿਹੜੀ ਮੀਡੀਆ ਨੂੰ ਮੰਦਾ ਚੰਗਾ ਨਹੀਂ ਬੋਲ ਰਹੀ। ਦਿਲਚਸਪ ਗੱਲ ਹੈ ਕਿ ਮੀਡੀਆ ਨੂੰ ਗਾਹਲਾਂ ਕੱਢਣ ਵਾਲੇ ਉਹਨਾਂ ਹਕੀਕਤਾਂ ਤੋਂ ਬਿਲਕੁ ਅਣਜਾਣ ਹਨ ਇਝਣਾ ਵਿੱਚ ਮੀਡੀਆ ਨਾਲ ਜੁੜੇ ਕਲਮ ਦੇ ਸਿਪਾਹੀ ਕੰਮ ਕਰਦੇ ਹਨ। ਵੱਡੇ ਵੱਡੇ ਚੈਨਲਾਂ ਦੇ ਵੱਡੇ ਵੱਡੇ ਸਟੂਡੀਓ ਦੇਖ ਕੇ ਸਮਾਜ ਅਤੇ ਸਿਆਸਤ ਵਾਲਿਆਂ ਦੇ ਬਹੁਤ ਵੱਡੇ ਹਿੱਸੇ ਨੇ ਇਹ ਧਾਰਨਾ ਬਣਾ ਲਈ ਹੈ ਕਿ ਸ਼ਾਇਦ ਸਾਰੇ ਮੀਡੀਆ ਵਾਲੇ ਇਹਨਾਂ ਏਅਰ ਕੰਡੀਸ਼ੰਡ ਦਫਤਰਾਂ ਵਿੱਚ ਕੰਮ ਕਰਦੇ ਹਨ। ਉਹਨਾਂ ਨੂੰ ਨਾਂ ਤਾਂ ਡਾਂਗਾਂ ਅਤੇ ਗੋਲੀਆਂ ਦਾ ਸ਼ਿਕਾਰ ਹੁੰਦੇ ਪੱਤਰਕਾਰ ਨਜ਼ਰ ਆਉਂਦੇ ਹਨ ਅਤੇ ਨਾਂ ਹੀ ਭੇਦਭਰੇ ਸੜਕ ਹਾਦਸਿਆਂ ਵਿੱਚ ਮੌਤ ਦੇ ਘਾਟ ਉਤਾਰੇ ਜਾਂਦੇ ਮੀਡੀਆ ਵਾਲੇ। ਦੇਸ਼ ਦੇ ਕਈ ਛੋਟੇ ਵੱਡੇ ਹਿੱਸਿਆਂ ਵਿਛਕ ਕੰਮ ਕਰਦੇ ਮੀਡੀਆ ਵਾਲੇ 24 ਘੰਟਿਆਂ ਵਿੱਚੋਂ 18-18 ਘੰਟੇ ਕੰਮ ਕਰਦੇ ਹਨ। ਦੇਸ਼, ਸਮਾਜ ਅਤੇ ਸਿਸਟਮ ਨੂੰ ਹਿਲਾਉਣ ਵਾਲਿਆਂ ਖਬਰਾਂ ਕੱਢਣ ਵਾਲੇ ਮੀਡੀਆ ਨਾਲ ਸਬੰਧਤ ਬਹੁਤ ਸਾਰੇ ਪੱਤਰਕਾਰਾਂ ਕੋਲ ਅਜੇ ਤੱਕ ਮੀਡੀਆ ਨਾਲ ਸਬੰਧਤ ਕਾਰਡ ਤੱਕ ਵੀ ਨਹੀਂ ਹੈ। ਸਰਕਾਰਾਂ ਵੱਲੋਂ ਪ੍ਰਚਾਰੇ ਜਾਂਦੇ ਤਨਖਾਹ ਗਰੇਡ ਦੀ ਤਾਂ ਉਹਨਾਂ ਤੱਕ ਕੋਈ ਖਬਰ ਵੀ ਨਹੀਂ ਪਹੁੰਚਦੀ। ਮੀਡੀਆ ਨੂੰ ਗਾਹਲਾਂ ਕੱਢਣ ਵਾਲਿਆਂ ਨੇ ਕਦੇ ਇਹ ਜਾਨਣ ਦੀ ਕੋਸ਼ਿਸ਼ ਵੀ ਨਹੀਂ ਕੀਤੀ ਕਿ ਉਹਨਾਂ ਦੇ ਘਰਾਂ ਦਾ ਗੁਜ਼ਾਰਾ ਕਿਵੇਂ ਹੁੰਦਾ ਹੈ? ਉਹ ਆਪਣੇ ਬੱਚਿਆਂ ਦੀ ਫੀਸ ਕਿਵੇਂ ਦੇਂਦੇ ਹਨ? ਉਹਨਾਂ ਦੇ ਮੀਡੀਆ ਕਾਰਡ ਕਿਓਂ ਨਹੀਂ ਬਣਦੇ? ਉਹਨਾਂ ਤੱਕ ਸਰਕਾਰਾਂ ਵੱਲੋਆਂ ਐਲਾਨੀਆਂ ਜਾਂਦੀਆਂ ਸਹੂਲਤਾਂ ਵੀ ਕਿਓਂ ਨਹੀਂ ਪਹੁੰਚਦੀਆਂ? ਉਹਨਾਂ ਨੂੰ ਜਿਊਂਦਿਆਂ ਸਾੜਨ ਦੀਆਂ ਧਮਕੀਆਂ ਦੇਣ ਵਾਲਿਆਂ ਨਾਲ ਕਿੰਝ ਸਿੱਝਣਾ ਹੈ?

ਇਸ ਲਈ ਇਸ ਮੌਜੂਦਾ ਦੌਰ ਵਿੱਚ ਖਤਰਾ ਸਿਰਫ ਸਿਆਸਤਦਾਨਾਂ ਤੋਂ ਨਹੀਂ ਸਮਾਜ ਦੇ ਉਹਨਾਂ ਹਿੱਸਿਆਂ ਤੋਂ ਵੀ ਹੈ ਜਿਹੜੇ ਮਚਲੇ ਬੰਦੇ ਹੋਏ ਹਨ। ਜਿਹੜੇ ਮੀਡੀਆ ਦੀਆਂ ਮੁਸ਼ਕਲਾਂ ਬਾਰੇ ਜਾਨਣ ਦੀ ਕੋਸ਼ਿਸ਼ ਵੀ ਨਹੀਂ ਕਰਨਾ ਚਾਹੁੰਦੇ। ਜਿਹਨਾਂ ਨੂੰ ਕੁਝ ਮਾੜਾ ਮੋਟਾ ਪਤਾ ਲੱਗ ਵੀ ਜਾਂਦਾ ਹੈ ਉਹ ਸਬੰਧਤ ਪੱਤਰਕਾਰ ਨੂੰ ਗੁਜ਼ਾਰੇ ਜਿੰਨੀ ਮਦਦ ਦੇ ਕੇ ਆਪਣਾ ਪੀ ਆਰ ਓ ਜਾਂ ਪ੍ਰੈਸ ਸਕੱਤਰ ਸਮਝਣ ਲੱਗ ਪੈਂਦੇ ਹਨ। ਪੱਤਰਕਾਰਾਂ ਤੇ ਘਰਾਂ ਦੇ ਗੁਜ਼ਾਰੇ ਦਾ ਬੋਝ ਵੀ ਹੁੰਦਾ ਹੈ ਅਤੇ ਸਪਲੀਮੈਂਟ ਕੱਢਣ ਲਈ ਪੈਂਦੇ ਦਬਾਅ ਦਾ ਬੋਝ ਵੀ। ਆਰਥਿਕ, ਸਿਆਸੀ ਅਤੇ ਸਮਾਜਿਕ ਦਬਾਵਾਂ ਹੇਠ ਪਿੱਸ ਰਹੇ ਪੱਤਰਕਾਰਾਂ ਨੂੰ ਤਿਲ ਤਿਲ ਕਰ ਕੇ ਮਰਦਿਆਂ ਦੇਖਣ ਦਾ ਤਮਾਸ਼ਾ ਦੇਖਦੇ ਹਨ ਸਮਾਜ ਨੂੰ ਬਦਲਣ ਦਾ ਢੌਂਗ ਕਰਨ ਵਾਲੇ ਲੋਕ। ਇਹਨਾਂ ਦੀ ਖੋਖਲੀ ਹਮਦਰਦੀ ਅਸਲ ਵਿੱਚ ਖੇਖਣ ਤੋਂ ਵੱਧ ਕੁਝ ਨਹੀਂ ਹੁੰਦੀ। 

ਮੀਡੀਆ ਦੀ ਮੌਜੂਦਾ ਸਥਿਤੀ ਵਾਲਾ ਨਿਘਾਰ ਦੋ ਦਹਾਕੇ ਤੋਂ ਵੀ ਪਹਿਲਾਂ ਸ਼ੁਰੂ ਹੋ ਚੁੱਕਿਆ ਸੀ ਜਿਸਨੂੰ ਸਮੇਂ ਸਮੇਂ ਤੇ ਬਦਲੇ ਹਾਕਮਾਂ ਨੇ ਆਪੋ ਆਪਣੇ ਫਾਇਦਿਆਂ ਲਈ ਹੀ ਵਰਤਿਆ। ਜਦੋਂ ਸੰਪਾਦਕ ਦੀ ਥਾਂ ਤੇ ਮੈਨੇਜਿੰਗ ਐਡੀਟਰ ਨਿਯੁਕਤ ਕਰਨ ਦਾ ਸਿਲਸਿਲਾ ਸ਼ੁਰੂ ਹੋਇਆ ਸੀ ਉਦੋਂ ਵੀ ਸਮਾਜ ਦਾ ਵੱਡਾ ਹਿਸਾ ਸੁਚੇਤ ਨਹੀਂ ਹੋਇਆ। ਹੁਣ ਜੇ ਮੀਡੀਆ ਵਾਲੇ ਸਪਲੀਮੈਂਟ ਮੰਗਦੇ ਹਨ ਜਾਂ ਇਸ਼ਤਿਹਾਰ ਮੰਗਦੇ ਹਨ ਤਾਂ ਉਹਨਾਂ ਨੂੰ ਇੱਕ ਬੋਝ ਵਾਂਗ ਦੇਖਿਆ ਜਾਂਦਾ ਹੈ। ਸਰਕਾਰਾਂ ਅਤੇ ਸਿਆਸਤਦਾਨਾਂ ਨਾਲ ਸਿੱਧੀ ਗੰਢ ਤਰੁੱਪ ਕਰਨ ਵਾਲੇ ਮਾਲਕਾਂ ਨੂੰ ਤਾਂ ਕੋਈ ਪੁੱਛਣ ਵਾਲਾ ਨਹੀਂ ਪਰ ਮਾਮੂਲੀ ਜਿਹੀਣ ਤਨਖਾਹਾਂ ਤੇ ਕੰਮ ਲਈ ਮਰਦੇ ਪੱਤਰਕਾਰਾਂ ਨੂੰ ਤਾਅਨੇ ਮਿਹਣੇ ਮਾਰਨਾ ਹੁਣ ਜੰਮਸਿੱਧ ਅਧਿਕਾਰ ਸਮਝਿਆ ਜਾਂਦਾ ਹੈ। 

ਇਹਨਾਂ ਸਾਰੀਆਂ ਮੁਸ਼ਕਲਾਂ ਅਤੇ ਵਧ ਰਹੇ ਸਿਆਸੀ ਦਬਾਵਾਂ ਦੇ ਮੱਦੇ ਨਜ਼ਰ ਇੱਕਜੁੱਟ ਹੋਣ ਦੀ ਲੋੜ ਪਹਿਲਾਂ ਨਾਲੋਂ ਕਿਤੇ ਜ਼ਿਆਦਾ ਵੱਧ ਗਈ ਹੈ। ਸਾਡੀ ਸਨਿਮਰ ਬੇਨਤੀ ਹੈ ਕਿ ਤੁਹਾਡਾ ਮੀਡੀਆ ਕੋਈ ਵੀ ਹੋਏ, ਤੁਹਾਡੇ ਸਿਆਸੀ ਵਿਚਾਰ ਵੀ ਜਿਹੜੇ ਮਰਜ਼ੀ ਹੋਣ, ਤੁਹਾਡਾ ਪੱਤਰਕਾਰਾਂ ਦਾ ਕੋਈ ਸੰਗਠਨ ਵੀ ਜਿਹੜਾ ਮਰਜ਼ੀ ਹੋਵੇ ਇਸਦੇ ਬਾਵਜੂਦ ਸਾਨੂੰ ਇੱਕਜੁੱਟ ਹੋਣਾ ਚਾਹੀਦਾ ਹੈ। 

ਪੀਪਲਜ਼ ਮੀਡੀਆ ਲਿੰਕ ਤੁਹਾਡੀ ਵੱਖਰੀ ਪਛਾਣ ਅਤੇ ਤੁਹਾਡੇ ਵਿਚਾਰਾਂ ਦਾ ਸਨਮਾਨ ਕਰਦਾ ਹੋਇਆ ਤੁਹਾਨੂੰ ਸਾਰਿਆਂ ਨੂੰ ਇੱਕ ਹੋਣ ਦਾ ਸੱਦਾ ਦੇਂਦਾ ਹੈ। ਅਸੀਂ ਤੁਹਾਡਾ ਨਾਮ ਤੁਹਾਡੇ ਮੀਡੀਆ ਅਤੇ ਤੁਹਾਡੀ ਜੱਥੇਬੰਦੀ ਸਮੇਤ ਬੜੇ ਸਨਮਾਨ ਨਾਲ ਲਵਾਂਗੇ। ਸਾਡੀ ਇੱਕ ਜ਼ਰੂਰੀ ਮੀਟਿੰਗ ਬਹੁਤ ਜਲਦੀ ਰੱਖੀ ਜਾ ਰਹੀ ਹੈ ਜਿਸ ਵਿੱਚ ਆਰਥਿਕ ਦਬਾਵਾਂ ਬਾਰੇ ਵੀ ਚਰਚਾ ਹੋਵੇਗੀ ਅਤੇ ਇਹਨਾਂ ਦੇ ਹੱਲ ਬਾਰੇ ਵੀ ਠੋਸ ਕਦਮ ਪੁੱਟੇ ਜਾਣਗੇ। 

ਕਿਰਪਾ ਕਰਕੇ ਆਓ ਅਤੇ ਆਪਾਂ ਰਲਮਿਲ ਕੇ ਮੀਡੀਆ ਦੇ ਭਲੇ ਲਈ ਕੁਝ ਕਰਨ ਦਾ ਜਤਨ ਕਰੀਏ। ਤੁਹਾਡਾ ਫਾਰਮ ਸਾਨੂੰ ਸਮੇਂ ਸਿਰ ਮਿਲ ਸਕੇ ਤਾਂ ਅਸੀਂ ਤਾਂ ਆਉਂਦੇ ਸਮੇਂ ਚ ਜਾਰੀ ਹੋਣ ਵਾਲਿਆਂ ਸੂਚਨਾਵਾਂ ਸਮੇਂ ਸਿਰ ਭੇਜ ਸਕਣਗੇ। ਇਸ ਮਕਸਦ ਲਈ ਕਿਰਪਾ ਕਰਕੇ ਆਲ੍ਹਣਾ ਫਾਰਮ ਅੱਜ ਹੀ ਭੇਜਣ ਦੀ ਖੇਚਲ ਕਰੋ। ਇਹ ਫਾਰਮ ਤੁਸੀਂ ਇਥੇ ਕਲਿੱਕ ਕਰਕੇ ਵੀ ਭਰ ਸਕਦੇ ਹੋ। ਤੁਹਾਨੂੰ ਇਸ ਪੋਸਟ ਦੇ ਨਾਲ ਵੀ ਇਹ ਫਾਰਮ ਛਪਿਆ ਹੋਇਆ ਨਜ਼ਰੀਂ ਪੈ ਜਾਵੇਗਾ। ਜੇ ਫਾਰਮ ਭਰਨ ਵਿੱਚ ਕੋਈ ਦਿੱਕਤ ਆ ਰਹੀ ਹੋਵੇ ਤਾਂ medialink32@gmail.com ਤੇ ਵੀ ਆਪਣਾ ਨਾਮ ਪਤਾ, ਮੋਬਾਈਲ ਨੰਬਰ ਅਤੇ ਮੀਡੀਆ ਦਾ ਨਾਮ ਭੇਜ ਸਕਦੇ ਹੋ। 

ਰੈਕਟਰ ਕਥੂਰੀਆ                            ਐਮ ਐਸ ਭਾਟੀਆ 

+919915322407                   +91 99884 91002

ਨਾਗਰਿਕਤਾ ਕਾਨੂੰਨਾਂ ਅਤੇ ਹਕੂਮਤੀ ਜਬਰ ਵਿਰੋਧੀ ਰੈਲੀ ਦਾ ਐਕਸ਼ਨ 19 ਨੂੰ

30 ਤੋਂ ਵੱਧ ਜਨਤਕ ਜੱਥੇਬੰਦੀਆਂ ਦੀ ਮੀਟਿੰਗ ਮਗਰੋਂ ਅਹਿਮ ਐਲਾਨ 

ਲੁਧਿਆਣਾ: 13 ਜਨਵਰੀ 2020:(ਐਮ ਐਸ ਭਾਟੀਆ//ਸਤੀਸ਼ ਸਚਦੇਵਾ//ਲੋਕ ਮੀਡੀਆ ਮੰਚ)::

ਫੋਟੋ ਦੀ ਮਾੜੀ ਕੁਆਲਿਟੀ ਲਈ ਸਾਨੂੰ ਅਫਸੋਸ ਹੈ 

ਕੌਮਾਗਾਟਾਮਾਰੂ ਯਾਦਗਾਰ ਕਮੇਟੀ ਜ਼ਿਲ੍ਹਾ ਲੁਧਿਆਣਾ ਦੇ ਸੱਦੇ'ਤੇ ਅੱਜ ਇੱਥੇ ਜ਼ਿਲ੍ਹੇ ਭਰ ਦੀਆਂ 30 ਤੋਂ ਉੱਪਰ ਅਗਾਂਹਵਧੂ, ਇਨਕਲਾਬੀ ਤੇ ਘੱਟ ਗਿਣਤੀ ਜਥੇਬੰਦੀਆਂ ਅਤੇ ਸੰਸਥਾਵਾਂ ਦੀ ਦੂਜੀ ਵਿਸ਼ਾਲ ਸਾਂਝੀ ਮੀਟਿੰਗ ਅੱਜ ਕਾਮਰੇਡ ਤਰਸੇਮ ਜੋਧਾਂ  ਦੀ ਪ੍ਰਧਾਨਗੀ ਹੇਠ ਹੋਈ। ਜਿਸ ਵਿੱਚ ਕੌਮੀ ਨਾਗਰਿਕਤਾ ਸਬੰਧੀ ਕਾਨੂੰਨਾਂ ਅਤੇ ਰਜਿਸਟਰਾਂ ਸਬੰਧੀ ਅਤੇ ਇਨ੍ਹਾਂ ਵਿਰੁੱਧ ਉੱਠੀ ਦੇਸ਼ ਵਿਆਪੀ ਵਿਦਿਆਰਥੀਆਂ, ਨੌਜਵਾਨਾਂ, ਘੱਟ ਗਿਣਤੀਆਂ ਸਮੇਤ ਤਮਾਮ ਜਮਹੂਰੀ ਅਤੇ ਇਨਕਲਾਬ ਇਨਸਾਫ਼ ਪਸੰਦ ਕਿਰਤੀ ਜਮਾਤਾਂ ਤੇ ਵਰਗਾਂ ਦੀ ਹੱਕੀ ਲੋਕ ਲਹਿਰ ਦਾ ਭਰਵਾਂ ਸਮਰਥਨ ਕਰਦਿਆਂ ਇਸ ਲੋਕ ਲਹਿਰ ਨੂੰ ਦਬਾਉਣ ਤੇ ਕੁਚਲਣ ਲਈ ਫਿਰਕੂ ਫਾਸ਼ੀ ਹਕੂਮਤੀ ਅਤੇ ਗੁੰਡਾ ਜਬਰ ਤਸ਼ੱਦਦ ਦੀ ਜ਼ੋਰਦਾਰ ਨਿਖੇਧੀ ਕਰਦਿਆਂ ਇਸ ਦਮਨ ਚੱਕਰ ਨੂੰ ਫੌਰੀ ਬੰਦ ਕਰਨ ਅਤੇ ਅੰਦੋਲਨਕਾਰੀਆਂ ਦੇ ਨੁਮਾਇੰਦਿਆਂ ਨਾਲ ਸਿੱਧੀ ਵਾਰਤਾਲਾਪ ਕਰਨ ਦੀ ਪੁਰਜ਼ੋਰ ਮੰਗ ਕੀਤੀ ਗਈ ਹੈ। ਮੀਟਿੰਗ ਨੂੰ ਸੰਬੋਧਨ ਕਰਦਿਆਂ ਵੱਖ ਵੱਖ ਨਾਮਵਰ ਆਗੂਆਂ ਸਰਵਸ੍ਰੀ ਜਸਦੇਵ ਸਿੰਘ ਲਲਤੋਂ, ਰਘਬੀਰ ਬੈਨੀਪਾਲ, ਐਮਐਸ ਭਾਟੀਆ, ਕੁਲਦੀਪ ਸਿੰਘ ਐਡਵੋਕੇਟ, ਰਾਜਵਿੰਦਰ, ਅਮਰਨਾਥ ਕੂੰਮ ਕਲਾਂ, ਪ੍ਰੋਫੈਸਰ ਜੈਪਾਲ ਸਿੰਘ, ਐਡਵੋਕੇਟ ਇੰਦਰਜੀਤ ਸਿੰਘ, ਸਤੀਸ਼ ਸੱਚਦੇਵਾ, ਸੰਦੀਪ ਰੁਪਾਲੋਂ, ਉਜਾਗਰ ਸਿੰਘ ਬੱਦੋਵਾਲ, ਗੁਰਨਾਮ ਸਿੱਧੂ, ਪਰਮਜੀਤ ਰੇਲਵੇ ਤੇ ਰਮਨਜੀਤ ਸੰਧੂ ਨੇ ਨਾਗਰਿਕਤਾ ਕਾਨੂੰਨਾਂ ਅਤੇ ਦਮਨ ਚੱਕਰ ਬਾਰੇ ਵਿਸਥਾਰ ਸਾਹਿਤ ਵਿਚਾਰ ਪ੍ਰਗਟ ਕੀਤੇ। ਅੰਤ ਵਿੱਚ ਵਿਸ਼ਾਲ ਸਾਂਝੀ ਮੀਟਿੰਗ ਨੇ ਸਰਬਸੰਮਤੀ ਨਾਲ ਅਹਿਮ ਫੈਸਲਾ ਲੈਂਦਿਆਂ ਦੇਸ਼ ਵਿਆਪੀ ਮੌਜੂਦਾ ਫਿਰਕੂ ਫਾਸ਼ੀ ਹਾਲਾਤਾਂ ਤੇ ਦਮਨ ਚੱਕਰ ਦੀ ਚੁਣੌਤੀ ਦਾ ਟਾਕਰਾ ਕਰਨ ਲਈ 'ਫਾਸ਼ੀਵਾਦ ਵਿਰੋਧੀ ਤਾਲਮੇਲ ਕਮੇਟੀ ਜ਼ਿਲ੍ਹਾ ਲੁਧਿਆਣਾ' ਦੀ ਸਥਾਪਨਾ ਕੀਤੀ ਗਈ। ਜਿਸ ਵਿੱਚ ਕਾਮਰੇਡ ਤਰਸੇਮ ਜੋਧਾਂ, ਜਸਦੇਵ ਸਿੰਘ ਲਲਤੋਂ, ਕੁਲਦੀਪ ਸਿੰਘ ਐਡਵੋਕੇਟ, ਗੁਰਨਾਮ ਸਿੰਘ ਸਿੱਧੂ, ਅਮਰਨਾਥ ਕੂਮ ਕਲਾਂ, ਇੰਦਰਜੀਤ ਸਿੰਘ ਐਡਵੋਕੇਟ, ਚੌਧਰੀ ਚਰਨ ਦਾਸ ਤਲਵੰਡੀ, ਚਰਨਜੀਤ ਹਿਮਾਯੂੰਪੁਰਾ, ਉਜਾਗਰ ਸਿੰਘ ਬੱਦੋਵਾਲ, ਪ੍ਰਕਾਸ਼ ਸਿੰਘ ਹਿੱਸੋਵਾਲ, ਪਰਮਜੀਤ ਸਿੰਘ, ਰਘਬੀਰ ਸਿੰਘ ਬੈਨੀਪਾਲ, ਬਾਲ ਕ੍ਰਿਸ਼ਨ, ਹਰਦੇਵ ਸਿੰਘ ਸਨੇਤ, ਬੱਗਾ ਸਿੰਘ, ਗੁਰਜੀਤ ਸਿੰਘ ਕਾਲਾ, ਸ਼ਿੰਦਰ ਜਵੱਦੀ, ਸਤੀਸ਼ ਸੱਚਦੇਵਾ, ਅਤੇ ਰਮਨਜੀਤ ਸੰਧੂ ਨੂੰ ਸਰਬਸੰਮਤੀ ਨਾਲ ਮੈਂਬਰ ਚੁਣਿਆ ਗਿਆ। ਤਾਲਮੇਲ ਕਮੇਟੀ ਨੇ ਠੋਕਵਾਂ ਐਲਾਨ ਕੀਤਾ ਕਿ 19 ਜਨਵਰੀ ਦਿਨ ਐਤਵਾਰ ਨੂੰ ਠੀਕ 11 ਵਜੇ ਸ਼ਹੀਦ ਸਰਾਭਾ ਪਾਰਕ (ਭਾਈ ਬਾਲਾ ਚੌਕ) ਲੁਧਿਆਣਾ ਵਿਖੇ ਵਿਸ਼ਾਲ ਫਾਸ਼ੀਵਾਦੀ ਵਿਰੋਧੀ ਰੈਲੀ ਕਰਨ ਉਪਰੰਤ ਰੋਸ ਮਾਰਚ ਕੀਤਾ ਜਾਵੇਗਾ।